Korrika Oiartzunen garai batean parranda egiten zen orduetan sartuko da
Korrikak bere ibilbidearen berri eman du. Oiartzunen azkeneko egunean sartuko da, goizaldean, Donostiara sartu baino lehenago.
![korrika 21 oiartzun](https://oarsoaldea.hitza.eus/site/files/2022/01/32655743887_bf6f9991f6_c.jpg)
Martxoaren 31n hasi eta apirilaren 10ean bukatuko da Korrikaren 22. ekitaldia. Berez iaz egin behar zuten euskalduntzearen aldeko lasterketa, baina COVID-19aren erruagatik atzeratu egin behar izan zuten.
AEK-k, Korrikaren antolatzaileak, gaur eman du ibilbidearen berri. Oiartzundik azkeneko egunean pasatuko da.
Irundik etorriko da lasterketa, eta 03:11n sartuko da herrian. 40 minutu inguruz ibiliko da Oiartzundik, Errenteria-Oreretara joateko. Ordutegiak, betiere, gutxi gora beherakoak izango dira, erritmoaren arabera.
Garai aurrepandemikoetan, parranda egiteko zein zapatilak janzteko aitzakia polita izaten zen Korrika. 22. ekitaldiarekin, nork daki: zapatilak jantzi bai, baina parrandarako aukera gutxi daudela dirudi. Kontuak kontu, apirilaren 10ekoa euskararen aldeko festa erraldoia izango da, aurreko 21 ekitaldietan bezala.