Lore Morek Oiartzunen landutako 'Trapu zikinak' hilaren 28an estreinatuko du
Udalbiltzaren 'Geuretik sortuak' proiektuaren barruan sortu da antzezlana. Oiartzunen izango da estreinaldia, eta lanak izango ditu herriari keinuak.
Lore More antzerki konpainia osatzen dutenak, Oiartzungo 'labaderoa'-n, egonaldia egin zutenean. Udalbiltzak Geuretik sortuak izeneko egitasmoa aurkeztu zuen pasa den maiatzean, Oiartzunen. Helburua euskarazko kultura sorkuntza sustatzea zen, eta 26 udalerrik bat egin zuten egitasmoarekin.
Lore More Nafarroako antzerki konpainiak egonaldia egin zuen abuztua eta iraila artean, Trapu zikinak antzezlana ontzeko. Garbitokiak dira ardatz, eta Oiartzungoa zein hari buruzko lanak izan zituzten inspirazio iturri. Herriko hainbat konturi keinu egin diete Lore Morekoek, askorik aurreratu gabe.
Maialen Diaz Urriza, Mikele Urroz eta Laura Villanueva aktoreek sortu eta eramango dute taulara, hilaren 28an, ostirala.
Emanaldia 19:00etan hasiko da, udaletxeko areto nagusian. Sarrerak bost euroko prezioa izango du, eta aldez aurretik Garmendi txokolategian eros daitezke. COVID-19arengatik indarrean dauden momentuko arauak errespetatuko direla jakinaraziko dute.
Gainontzeko lanak
Geuretik sortuak egitasmoaren barruan ondutako gainontzeko antzezlanak herrian ikusteko aukera egongo da. Honakoa da izango da programazioa:
- Apirilak 24: Oiartzungo Metrokoadroka kultur elkartearen Bidaide.
- Maiatzak 25: Oier Zuñigaren Eresia (Eneko Gil dantzari oiartzuarrak parte hartzen du lan honetan).
- Ekainak 19: Ttanttakaren Sexberdinak
- Irailak 18: Bonbon Beltzen Harriminak (lan honetan Ttittika Rekaltek parte hartzen du).
Antzezlanez gain, sortu diren bost film laburren emanaldia ere egingo dute, data zehatzik gabe. Horrez gain, literatura ere sustatu dute. Martxoaren 15ean aurkeztuko dute proiektuan parte hartu duten idazleen lanez osatutako Hamazazpigarrenean aidanez liburu-aurkezpena izango da, Iñaki Martiarena Mattin ilustratzailearen parte-hartzearekin.
25.000 euro
Euskarazko sorkuntza sustatzeko asmoz, udalak 25.000 euro bideratu ditu. Horrez gain, Lore Moreren egonaldirako azpiegiturak eta baliabideak bideratu ditu. Nafarrek Karrikako Iturburu etxean hartu zuten ostatu, eta entseguak Karaez 4ko lokalean egin zituzten.
