Giriziaren pala txapelketak osasuntsu dagoela erakutsi du
Pala Txapelketa Irekia hasi da. Pandemiaren arrastorik ez da nabaritzen izena eman dutenen kopuruan, eta duela bi urtekoaren mailara iritsi da.
Zutik, Cabaleiro, Olazabal, Toledo epailea, Lertxundi eta Contreras. Makurtuta, Arruabarrena anaiak, Laso eta Loidi. Negu gorrian hasi eta udaberri loretsuan bukatu ohi da Euskal Herriko Pala Txapelketa Irekia. Tradizio bilakatu da palistei zuzendutako txapelketa hori, ia lau hamarkadatan aritu baitira larrua Madalensoro pilotalekuko horma gogorraren kontra zigortzen, larunbat eta igande goizetan.
Asteburu honetan jokatuko dute Euskal Herriko Pala Txapelketaren hirugarren jardunaldia, bihar eta etzi (ikus hemen kartelera). Girizia elkartearen pilota sailak antolatzen du txapelketa; aurtengoa 38. ekitaldia da. Ez dira denak jarraian izan, iaz etenaldia egin baitzuten, pandemiak hala behartuta.
Aurten ere zalantzatan ibili direla aitortu du Martxel Toledo antolatzaileak: «Txapelketa berriro martxan jartzea kosta baino gehiago, guretzako zailena izan da osasun neurri guztiak errespetatu behar direla ikustea, udalarekin hitz egitea, jarritako baldintza horiek nola gainditu aztertzea… Ez da erosoa izan». Zalantzak behin betiko uxatzeko arrazoietako bat izan zen pilotariengan ikusi zuten gogoa.
Orain dela bi urte 83 bikotek eman zuten izena, eta aurten —oraingoz— 74 dira parte hartuko dutenak. Kopurua handitu daiteke, emakumeen txapelketa martxoan hasiko baita. Girizia pilota saileko kideak pozik daude kopuru horrekin, COVID-19ak sortutako egoerak ez baitu arrasto —parte hartzean, gutxienez— handirik utzi.
«Gizonen Hirugarren Mailan 40 bikotek eman dute izena, duela bi urte bezala, eta lehenengo eta bigarren mailen artean bospasei gutxiago egongo dira. Ez da aldaketa handia. Ikusten da gogoa badagoela, jende berria sartu dela, eta aurrekoek ere jarraitzen dutela». Pala txapelketa, beraz, osasuntsu dago.
Neurriak pilotalekuan
Kiroldegia kudeatzen duen enpresak du Madalensororen funtzionamendua aurrera eramateko ardura, eta baldintza bakarra jartzen dute: jokatzen ez dutenek, izan ikusle edo jokalari, maskara jantzita eramatea. Jokalariei federazioak eskatzen die pasaportea izatea.
Horregatik, Toledok gonbita egin die herritarrei partidak ikustera joateko. Jokalarien ingurukoak izan ohi dira joaten direnak.
Txapelketa behin ibiltzen hasita, ezustekorik ez gertatzea da Giriziaren desioa. Izan ere, 2020ko ekitaldia eten egin behar zuten, eta ohi baino beranduago bukatu zen, abuztuan. Aurten, printzipioz, maiatzean bukatzea espero dute. «Ea zortea daukagun eta dena ongi joaten den», adierazi du Toledok.
Beraienari ez ezik, gainontzekoenei ere begiratzen die. Oraingoz bertan behera dauden txapelketak berriro martxan jartzea desio du. «Kirola osasuna dela esaten badigute, hori hala dela erakutsi beharko da».
