Bere azken diskoa aurkeztuko du Liher taldeak larunbatean
Laukote gipuzkoarrak 'Eta hutsa zen helmuga' izeneko laugarren lana jendaurrean jarriko du datorren larunbatean, Intxaurrondoko Kultur Etxean.
Lide Hernando, Iñigo Etxarri, Ander Berzosa eta Joshka Natke dira Liher. 
Larunbatean disko berria aurkeztuko du Lide Hernandok (Donibanen bizi donostiarra), Iñigo Etxarrik (sanjuandarra), Ander Berzosak (donostiarra) eta Joshka Natkek (zaldibiarra) osatzen duten Liher taldeak, Lamiak bandarekin elkarlanean, Intxaurrondoko Kultur Etxean. Saioa 21:00etan hasiko da.
Eta hutsa zen helmuga Liherrek 6 urteko ibilbidean argitara atera duen laugarren lana da. Taldekideek “shock emozional” gogorra pairatu behar izan zuten 2020ko otsailean euren hirugarren diskoa kaleratu eta pandemiak bete-betean euren planak bertan behera uztera behartu zituenean. Bizitako hartatik ikasi eta lan berriari esker “birjaio” direla aitortu dute.
Larunbateko kontzerturako sarrerak dagoeneko eskura daitezke. Esteka honen bidez eginez gero, 12 eurotan erosi ahal izango dira; egunean bertan leihatilan 15 euroko prezioa izango dute.
