Zortzi kategoriatik lautan izan dira garaile Oarsoaldeko batelak
San Pedron lehiaturiko Gipuzkoako Batel Ligako bigarren estropadan bi urre erdietsi ditu San Juanek, eta bana San Pedro eta Hibaikak.
San Pedrok hartu zuen, joan den larunbatean, Gipuzkoako Batel Ligako bigarren jardunaldia. 
Joan den larunbatean lehiatu zuten badian, Sanpedrotarra Arraun Elkarteak antolatuta, 2022ko Gipuzkoako Batel Ligako bigarren jardunaldia. Zortzi kategoriatik zortzitan aurkeztu zuten ordezkaritza San Juan, Hibaika eta San Pedrok, eta emaitza oparoekin, gainera. Lau urre erdietsi zituzten eskualdeko arraunlariek, eta beste hainbat batel izan zituzten podiumetan.
Haur mutiletan moreen A ontzia izan zen garaile; Mutilen Gazte mailan San Juan A, eta kategoria bereko nesketan arrosak berriro (lehen jardunaldian bezala); azkenik, Absolutu nesketan garaipena ziurtatuta zuten Oarsoaldekoek, Hibaika eta San Juan bakarrik izan baitziren lehian; Errenteria-Oreretakoek lortu zuten urrea, lehen norgehiagokan egindakoa errepikatuz.
Urreez ez ezik, zilar eta brontze koloreko beste hainbat domina ere etxean gelditu ziren. Promesa nesketan San Juan B bigarren sailkatu zen, Orio A-ren atzetik, 4 segundo baino gutxiagoko aldeagatik. Gazte nesketan sanjuandarren atzetik, bigarren bukatu zuten Hibaikako arraunlariek. Absolutu mutiletan, azkenik, San Juan A eta San Juan B-k, hurrenez hurren, birbildu zuten Donostiarrak koroaturiko podiuma.
Gipuzkoako Arraun Federazioak sailkapena osorik argitaratu du; hemen klik eginda ikus daiteke.
