Emakume korrikalarien taldea Donibanen ere sortuko dute
San Pedro eta Antxoko emakumeak joan den irailetik aritzen dira astero elkarrekin korrika. Iniziatiba Donibanera ere zabaldu nahi dute otsailetik aurrera.
Donibaneko emakumeek ere elkarrekin korrika aritzeko aukera izango dute otsailetik aurrera. 
Pasaiako Emakumeentzako Jabekuntza Eskolaren (PJE!) baitan, joan den irailetik dago martxan Emakume korrikalarien taldea Antxo eta San Pedron. Donibaneko emakumeek ere taldetxoa sortuko dute otsailetik aurrera.
Emakume korrikalariak astean behin elkartuko dira, hobekien datorkienean. Bi data proposatu dituzte hasiera batean, eta izen emate gehien dituen egun eta orduan zehaztuko dute hitzordua aurrerantzean. Honakoak dira hautabideak: asteazkenetan, 20:00etatik 21:00etara; edota ostiraletan, 17:30etik 18:30era.
Taldea osatzen dutenak barrutiko kirolgunean elkartuko dira astero, otsaileko lehenetik aurrera. Izena emateko posta elektroniko bidez edota 943 34 40 34 telefonora deituz jarri beharko da harremanetan arduradunekin, honako datuak zehaztuz: izen-abizenak, telefonoa, e-maila, adina eta bi aukeren artean hobesten dena.
