Gehienez ere 24 orduz aparkatu ahal izango da elbarrientzako plazetan
Elbarri txartela izanda ere, epe hori pasata aparkalekuan jarraitzen duen ibilgailuari isuna jarriko diote. Atzo onartu zuen udalbatzak neurria.
Elbarrientzako plazetan titulu hori aitortzen dien txartela dutenek soilik aparka dezakete; gehienez ere 24 orduz, aurrerantzean. 
Atzoko ohiko plenoan aho batez onartu zuen Pasaiako udalbatzak elbarrientzako aparkalekuen ordenantzan egin berri den aldaketa: aurrerantzean, gehienez ere 24 ordu jarraian eman ahal izango ditu ibilgailu bakoitzak elbarrientzako aparkaleku berean. Epe hori igarota automobila erretiratu ezean, isuna jarriko die Udaltzaingoak horien titularrei.
Lore Suarez alkateordeak atzo adierazi zuenez, pasaitarren zenbait kexa jaso izan dira udaletxean, dibertsitate funtzionala dutenentzako plaza generikoak “aparkaleku iraunkor bezala” erabiltzen dituzten gidariak badirelako. Egunera arte aparkalekuen ordenantzak ez zuen aurreikusten autoa uzteko ordu mugarik, eta murriztapen hori bera da atzo zinegotziek bozkatu zutena.
Zehaztu beharra dago, betiere, neurriak elbarrientzako aparkaleku generikoei soilik eragingo diela, ez eta behar bereziengatik aitorturiko plaza (matrikularekin zehaztutakoa, kasu) dutenei.
