Klima eta Energia Plan bat egiteko prozesua abiatu du udalak
Udal ekintzak planifikatzen hasteko galdetegi bat kaleratu dute, pasaitarren kezka nagusiak ezagutzeko helburuz. Herri-eztabaida saio bat ere egingo da.
Udalaren energia kontsumoa %35 murriztu nahi dute plan berriaren bitartez. 
Pasaiako Udala Klima eta Energia Plan bat diseinatzeko lanetan hasi da, eta herritarren parte hartzea galdegin du hartarako, inkesta baten bidez. Hartuko diren neurriekin berotegi-efektuko gasen isurketak %40ean murriztu nahi dira 2030erako.
Plana udalerriko sektore guztietara bideratzea da asmoa, udaletik bertatik hasiz: fokua jarriko dute eraikinen eta argiteria publikoaren energia eskaria murrizten eta udal ekipamenduetan energia berriztagarriak instalatzen laguntzen duten neurrietan. Udalaren energia kontsumoa %35 gutxitu eta energia berriztagarria sortzeko gaitasuna handitzea da asmoa.
Udalak pasaitar guztiak deitu ditu webgunean erantzungai dagoen inkestan parte hartzeko, planaren bidez landuko diren gaiei buruz duten iritzia jakiteko. Ildo horretan, parte hartze saio irekiak egitea ere aurreikusi dute, planaren nondik-norakoen berri emateko eta bizilagunak gehien kezkatzen dituzten gaiei buruz eztabaidatzeko.
