Eguzki: "Donibaneko saneamenduak 21 urte daramatza legea bete gabe"
Legeak 2001era arteko epea ezarri zuen kolektore sarea ezartzeko muga gisa. Eguzkik zehapenak eskatu ditu, baita Lezon ere.
11/1995 Errege Lege Dekretuak zehazten du hondakin urak saneamendu sare baten bidez jaso behar direla, tratamendurik gabe uretara doazen isurketa kutsatzaileak ekiditeko. 
Enegarren aldiz salatu du Eguzkik Donibaneko alde zaharreko hondakin urak badiara isurtzen direla, eta indarrean dagoen legedia urratzen duela horrek. Oraingo honetan, urteurren berezi batengatik egin du salaketa, berriki 27 urte bete baitira hondakin-uren tratamenduari buruzko 11/1995 Errege Lege Dekretua onartu zenetik, eta Pasaian “ospatzeko ezer” ez dagoela uste du talde ekologistak.
Aipatutako araudiak, 4. artikuluan, 2001eko urtarrilaren 1era arteko epea ezartzen zuen kolektore sistema egokia instalatzeko muga gisa, baina, jakina denez, barrutiaren alde zaharreko etxebizitzek ez dute oraindik ere halako saneamendu sarerik. Haratago joan da Eguzki, iragarri dutenaren arabera, Lezoko Altamira auzoko eraikinak “hasieratik” eraikitzen ari baitira sarearekin loturarik izan gabe, eta horiek ere, beraz, inolako tratamendurik gabe isurtzen dira badiara.
21 urte gehiegi direla argi eta garbi adierazi dute. Hori horrela, neurri zigortzaileak galdegin ditu talde ekologistak bi hamarkadetan legea urratu izanagatik: “Justiziak, legea betetzen dela bermatzeko lanean, azkar, irmo eta eredugarri jokatu dezala. Europako nahiz Estatuko zuzentaraua ez betetzeagatik zehapen-epaiak eman diren bezala, gure ustez, kasu honetan ezin da beste alde batera begiratu, eta horren arabera jokatu behar da”.
