Maila handiko partida espero da Agustina Otaolan
EPLEko bikotea Euskal Ligako Ohorezko Mailako finalerdietan sartzeko borrokan dago, eta Zaramagako bikotea izango dute aurrean. Klubetik ere gogorarazi nahi dute pilota eskolako izen emateak irekita daudela.
Mikel Aranguren, Epleko Pilotaria. Argazkia: Gipuzkoako Euskal Pilota Federazioa Maila handiko partida aurreikusten da larunbatean Agustina Otaola pilotalekuan. 11:30ean hasita, Euskal Ligako Ohorezko Mailako eskuz binakako partida jokatuko da EPLE eta Gasteizko Zaramaga klubaren artean. EPLEko Etxezarreta eta Aranguren nor baino nor arituko dira Zaramagako Bengoa eta Cecilio bikotearen aurka. EPLEko pilotariak txapelketako finalerdietan sartzeko borrokan murgilduta daude, eta momentu honetan bi garaipenekin eta porrot batekin dira sailkapenean.
Pilota eskolan aritzeko
EPLEk gogorarazi nahi du pilota eskolarako izen emateak irekita daudela. Pilota klaseak doakoak direla azpimarratu dute klubetik, eta Agustina Otaola frontoira joatea animatu nahi dituzte herriko gazteak, eskuz eta palan ibili daitezen, bi modalitateak probatzeko.
Eskuz ibiltzeko, 2010 eta 2013 artean, biak barne, jaiotako umeak daude deituta, eta palan ibiltzeko, berriz, 2006 eta 2009 artean jaiotakoak. Dena den, zalantzarik izanez gero, interesdunek 680 71 94 22 telefonora deitu edo WhatsApp mezu bat bidali dezaketela zehaztu dute klubetik.
