Don Boscoko ikasleek zama-bizikleta berri bat diseinatu dute
Gipuzkoako Foru Aldundiaren laguntzarekin, Gurpil Artea eta Analema Design Studiorekin batera diseinatu dute bizikleta ikasleek. Proiektuaren helburua da salgaiak bizikletaz banatzea eta mugikortasun jasangarria sustatzea.
Don Boscoko ikasleak bizikletarekin. Don Bosco ikastetxeko Erdi Mailako Zikloko soldadurako eta galdaragintzako ikasleek, Gurpil Artea elkartearekin batera, salgaiak bizikletaz banatzea sustatzeko zama-bizikleta berri bat diseinatu dute. Gaur goizean aurkeztu dute proiektua Don Boscon eginiko agerraldi batean Rafaela Romero Mugikortasuneko eta Lurralde Antolaketako Foru Diputatuak, Ander Iturri Mugikortasuneko zuzendariak, Dani Ruiz soldadurako eta galdaragintzako irakasleak, Oihan Lopez Gurpil Arteako kideak eta soldadurako eta galdaragintzako bederatzi ikasleek.
Gipuzkoako Foru Aldundiko Mugikortasuneko eta Lurralde Antolaketako Departamenduak bultzatuta, proiektu horrek Europaren gomendioari erantzuten dio, hirien erdialdeetan salgaien garraioa handitzeko. Proiektuak balioa ematen dio erakundeen eta prestakuntza zentroen arteko lankidetzari, gazteek mugikortasuna eraldatzeko duten ikuspegia bultzatzeko.
Zama-bizikleta hori, Analema Design Studiorekin batera diseinatu da, eta duen diseinuari esker, herritarrek mugitzeko modu berri bat txertatu ahal izango dute euren negozioen eta jardueren egunerokoan. Proiektu horren helburua da, gure lurraldeko hiri eta udalerrietan paketeak, janaria eta bestelako gauzak garraiatzeko bizikleta gehiagotan erabiltzea.
Rafaela Romero Mugikortasuneko eta Lurralde Antolaketako Foru Diputatuaren hitzetan, “proiektu honek bizikletaren erabilera eta jarduera ekonomikoa dinamizatzeko ekimen bati erantzuten dio, mugikortasun jasangarriaren sustapenarekin, tokiko garapenarekin eta Gipuzkoa hobetzeko berrikuntzaren eta modernizazioaren sustapenarekin bat egiten duena. Sailaren helburu horiek guztiak gure lurraldea erreferente bihurtzeko dira. Lurraldebus eta MUGIrekin garraio publikoan ari gara, eta bizikleta bidezko mugikortasunean ere izango gara”.
Gurpil Artea izan da ikasleekin batera lanean gogor aritu den elkartea, Analema Design Studiorekin batera. Oihan Lopez da Gurpil Artea elkarteko kideetako bat, eta azpimarratu du proiektuak “bi helbururi” erantzuten diela. “Batetik, herritarrei beste bizikleta modalitate bat hurbiltzen diegu, tamaina handiko zama astunak modu eroso eta seguru batean garraiatzea ahalbidetzen diena; eta, bestetik, jasangarritasunarekin lotutako proiektuen bidez ikasleen gaitasunak sustatu ditugu”. Horrez gain, Birziklatu proiektuaren filosofia abiapuntutzat hartuta, bi bizikleta erabili dituzte zama-bizikleta berria eraikitzeko: “Berrerabilpenaren bidez guztiz erabilgarria den zerbait sortu dugu”, eutsi du Lopezek.
