Herritarrei "beste behin plenoko sarrera debekatu" dietela salatu du EH Bilduk
Osteguneko osoko bilkuran ere alkateak zenbait laguni bertaratzea debekatu ziela salatu du koalizio subiranistak, aforoa beteta egon ez arren. "Ez da lehen aldia".
Lezoko EH Bilduk, hedabideei bidalitako ohar baten bidez, alkate Jesus Mari Martiarenak eta EAJ eta PSEk osatutako udal gobernuak “darabilten jarrera” salatu nahi izan du, “herritarren hitza isilaraztea eta parte hartzea debekatzea oso kontu larria baita” haien ustez. Izan ere, osteguneko osoko bilkuran hainbat herritarrek bilkura horretan parte hartu nahi izan arren, alkateak “udaletxeko ateak itxi” zizkiela salatu dute amorruz, “COVIDaren aitzakiapean”.
Udala herritarren zerbitzura egon beharrean “herritarrei udaleko ateak ixten” ari dela diote, eta horregatik, alkateari eta gobernu taldeari “duten jarrera alboratu eta herritarrek osoko bilkuretan parte hartzeko duten eskubidea errespeta dezaten” eskatu diete.
Udalak COVID-19ari aurre egiteko aretoetan ezarritako gehienezko aforoaren arabera, 16 lagun sar daitezke, eta osteguneko osoko bilkuran orotara 12 lagun izan ziren, 11 zinegotzi eta bi teknikari. “Begi bistakoa da ez zegoela inolako arrazoirik hiru herritarren sarrera debekatzeko, gutxienez”.
Koalizio subiranistako kideen arabera, ostegunekoa ez da sarrera debekatzen duten lehen aldia. 2021ko ekainean Gezala auditoriumean egindako osoko bilkuran ere herritarren presentzia debekatu zutela gogoratu eta salatu dute. “Kasu horretan 13 zinegotzik eta teknikari batek parte hartu zuten. Gezalaren edukiera, garai hartako COVIDari aurre egiteko osasun neurriak kontuan izanda, 60 pertsonakoa zen, baina orduan ere, herritarren sarrera debekatu zuen”.
