Ekainaren 27tik uztailaren 3ra bitartean egingo dira udalekuak, iazko toki kopurua bikoiztuta. Martxoaren 31ra arte eman daiteke izena. Begirale eta sukaldari bila ari dira.
Aurtengo udalekuak ibiltariak izango dira. 
Udalerri Euskaldunen Mankomunitateak (UEMAk), aurten ere bai, Salto! udalekuak antolatu dituzte, ekainaren 27tik uztailaren 3ra. Izena emateko epea zabalik jakinarazi du UEMAk, martxoaren 31ra arte. 14 eta 18 urte arteko gazteei dago zuzenduta.
Aurten ere ibiltaria izango da. 50na laguneko bi zutabe abiatuko dira, bata Etxarri Aranaztik (Nafarroa) eta Tolosatik bestea. Leitzan elkartuko dira.
Udalerri euskaldunetako gazteak euskararen inguruan sentsibilizatzea, kontzientzia eta eragile aktibo bihurtzea da udalekuen helburua.
Iaz gazte askok eman zutenez izena, eta asko kanpoan geratu zirenez, toki kopurua bikoiztea erabaki du UEMAk. Izena emateko hiru modu eman dituzte:
- UEMAren webgunearen bitartez.
- Telefonoz 943 91 66 99.
- E-posta bidez idatzita.
Lan eskaintza
2022ko Salto! udalekuetan lan egiteko pertsonen bila ari dira. Zehazki, aisialdiko begiraleak eta sukaldariak behar dituzte.
Curriculuma e-posta bidez bidali beharko dute interesa dutenek, martxoaren 4a baino lehenago. Ondorengoak baloratuko dituztela jakinarazi dute:
- Begirale titulua izatea.
- EGA edo baliokidea izatea.
- Hezkuntzarekin zerikusia duten ikasketak izatea edo egitea.
- Eskarmentua antzeko lanetan.
- Euskararekiko sentsibilizazioa.
- Taldean lan egiteko erraztasuna.
