Koldo Fernandez Etxarte OKEko presidentea hil da
1978-79 denboraldian sartu zen Oiartzun Kirol Elkarteko zuzendaritzan. 11 denboraldi zeramatzan presidente karguan, eta gaur hil da, gaixotasun baten erruz.
Koldo Fernandez. Koldo Fernandez Etxarte Oiartzun Kirol Elkarteko presidentea hil da gaur. Aspalditik gaixo zegoen Fernandez.
Bere izena klub urdinari lotuta egon da azkeneko lau hamarkadatan. Izan ere, 1978-79 denboraldian sartu zen OKEko zuzendaritzan, idazkari lanetan. Aurreko denboraldian Haur Mailako mutilen taldea entrenatu zuen, eta Gipuzkoako txapeldun izan ziren.
Azkeneko 11 denboralditan klubeko presidentea izan da, eta Oiartzun Kirol Elkartea lehenengo mailara eramatea lortu zuen, emakumeen futbola profesionalismorako trantsizio betean zegoenean. Egun hirugarren mailan dago, eta ez da erronka makala 10.000 biztanleko herri batentzat. Mutilen futbol talde nagusia, berriz, Ohorezko Erregional Mailan utzi du. Guztira, hogei talde inguru ditu klubak, eta 400 jokalari baino gehiago.
Futbolaz gain, Arragua auzoan ere lanean aritutakoa zen.
Fernandezen pasioa zen kluba, eta dedikazio handiarekin bizi zuen. HITZAk ere eskertu nahi du telefono deiei erantzuteko zuen prestutasuna, baita ere igandero bidaltzen zituen emaitzen zerrendak eta kronikatxoak.
Etxea izan dueneko kideek Twitter bidez adierazi dute bere samina. Euskadiko Futbol Federazioak ere bat egin du doluarekin.
Gaur egun gogorra da Oiartzun Kirol Elkarteko familiarentzat. Koldo Fernandez lehendakaria hil da. Besarkada goxo bat senitarteko eta gertukoei.
— Oiartzun KE (@OiartzunKE_) February 18, 2022
Goian bego presi. pic.twitter.com/Lf8c4nf908
