Udaberri honetan toka eta noka loratuko dira Oiartzunen
Ttur-ttur Euskaltzaleon Bilguneak Hikalaguna dinamika egingo du udaberrian. Izena emateko epea zabalik da, eta taldeka edo banaka bat egin daiteke. Hika aritzeko konpromisoa eskatu dute, data zehatz batzuetan.
Hikalagunan parte hartzen dutenen artean liburuxka banatuko dute.
Ttur-ttur Euskaltzaleon Bilguneak aspalditik du kezka hitanoaren erabilerarekin. Izan ere, Oiartzunen, hika aritzen direnen profil zehatza zein den zehaztu du euskara elkarteko Itsaso Aldaik: adineko gizonak. Eta, gainera, gutxi erabiltzen da.
Hitanoa berreskuratzeko hainbat dinamika abiarazi dituzte azken urteotan, ikastaroak edo Hikaldia, esaterako. Emakume eta gazteengan —batez ere— eragiteko egitasmo berria aurkeztu dute orain: Hikalaguna. Udaberrian egingo dute, martxoaren 21etik ekainaren 21era bitartean.
«Mintzalagunaren ideia hartu dugu Hikalaguna osatzeko, baina hura baino zerbait informalagoa egin nahi genuen. Aurrez egindako ikastaroen alde praktikoa izango da, nolabait», iragarri du Aldaik. Hala ere, mingaina hikaren erritmoan jarri nahi duen edonor beso zabalik jasoko dutela nabarmendu du.
Gogorarazi duenez, Mintzalagun taldeetan mintzalaguntzailearen figura dago, baina Hikalagunaren kasuan zaila ikusten zuten talde bakoitzean hitanoa menperatzen duen bat aurkitzea. Hala ere, inor ez dadila kezkatu edo beldurtu: Ttur-tturrek liburuxka bat osatu du, Oiartzungo hitanoaren formak jasotzen dituena.
Idoia Beratarbide Arrietak egin ditu ilustrazioak, eta Dixidu estudioak maketatu du liburuxka. Izena ematen dutenen artean banatuko dute liburuxka hori, ikastarorako tresna izan dadin, zalantzak daudenerako helduleku gisa.
Taldeka edo banaka eman daiteke izena. Taldeka emanez gero, adierazi dute «komenigarria» dela taldeko batek hitanoa menperatzea. «Baina ez da derrigorrezkoa», zehaztu du Aldaik.
Bakarka izena ematen dutenekin eurek osatuko lukete taldea, eta iragarri du saiatuko direla talde horietan ikastaroetatik pasatu den bat txertatzen. Izena ematen dutenen arabera antolatuko dituzte taldeak.
Saioak informalak izango direla zehaztu dute, eta horren adibide izango dira haien maiztasuna. «Talde bat elkartu daiteke hilean behin, edo astean behin. Hori norberak erabakiko du. Hikalagunak bai eskaintzen duela askatasun handiagoa. Saio bakoitzaren iraupena ere bakoitzak finkatuko du».
Adibide batekin ilustratu du hori: «Talde batean astean egun batez joaten badira, aprobetxa daiteke beraien artean hika aritzeko. Konpromiso bat hartzea izango da, tarte batean denak hika aritzeko».
Izen ematea
Aste honetan bertan ireki dute izena emateko epea. Eskuorria bete eta Ttur-ttur Euskaltzaleon Bilgunearen egoitzan (Fermiñene etxea; Aialde kalea 2, 2. solairua) entregatu edo Hikalagun buzoietan utz daiteke. Toki honetan egongo dira buzoiak: Elorsoro kiroldegian, Manuel Lekuona bibliotekan eta Haurtzaro Ikastolan. «Eskuorrian bai jarri dugula zehazteko noiz geldituko diren, baita kontaktu bat ere. Jarraipen bat egiteko da, gure estatistiketarako», adierazi dute. Online ere egin daiteke; bakarka izena emateko kasuan, edo taldeka.
Beraz, ate joka den datorren udaberrian Oiartzunen hika eta noka berriro loratzea izango da helburua, gazte, ez hain gazte eta andre zein gizonen artean. Animatuko al ñaz/yaz?.
