Herriko kultur eragileak datorren asteazkenean elkartuko dira
Oiartzungo kulturgintzaren artikulazioari eta saretzeari bultzada emateko gogoeta prozesu egin zuten iaz. Talde eragileak egindako bidea azalduko dute.
Kulturgintza saretzeko talde eragileko hainbat kide. Mendiburu 14 eraikinaren funtzionamenduaren harira, herriko kultur eragile, sortzaile eta udal ordezkariak elkartu ziren. Kultur areto berria izango den horri buruzko hausnarketa, hala ere, urrunago joan zen, eta herriko kulturgintzaren artikulazioari eta saretzeari buruzko gogoeta prozesu partekatua egin zuten.
“Oiartzunerako desiratzen dugun kulturgintzaren zutabeak definitu genituen eta boluntarioz osatutako talde eragile bat aritu da prozesu hark eman zituenei forma gehixeago ematen”, adierazi dute prozesuan parte hartu dutenek.
Bide horretan jarraitzeko, datorren asteazkenean —martxoak 2— bilera egingo dute herriko kultur eragileekin. 18:30ean jarri dute hitzordua, udaletxeko areto nagusian. Talde eragileak egin duen bidea herriko kultur taldeekin partekatuko dute asanblea batean.
“Dagoeneko jarduera aberatsa duen Oiartzungo kulturgintzari hauspo berria eman nahi diogu eta horretarako konfiantza ereitea, eragileok saretzea eta kulturgintza kohesionatu baterako bidea elkarrekin egitea funtsezkoak dira”, adierazi dute.
Batzarra, zehaztu dutenez, talde eragileak orain arte landutakoa partekatzeko, iritziak jasotzeko eta kontrastatzeko izango dela iragarri dute. Izan ere, elkargune hori izango da aurrera begirako urratsak berretsiko dituena.
Herriko kultur eragileei dei egin diete bertan parte har dezaten. “Honek biderik egingo badu”, adierazi dute, “eragileen parte-hartze eta sormenaren iturritik etorriko baita”.
Batzarrera joateko asmoa duenak aldez aurretik jakinaraztea eskertzen dutela adierazi du udaleko Kultur Sailak. Horretarako e-posta bidez jarri behar da harremanetan.
