Share proiektua 2023an iritsiko da Errenteriara
Errenteria-Oreretako Udala Afrikako eta Europako hainbat eragilerekin batera dago elkarlanean. Helburua da bi kontinente horien arteko ezagutzak eta esperientzia trukeak sustatzea.
Share proiektua. Sorkuntzan eta hezkuntzan zentratzen den Share proiektua Europar Batasunak diruz lagundutako nazioarteko proiektua da, 2021-2024 artean garatuko dena. Errenteriako Udala proiektuaren bazkideetako bat da, Kroazia, Burkina Faso, Eslovenia, Kamerun, Frantzia, Ghana eta Palestinako hainbat eragilerekin batera. 2023an iritsiko da proiektua Errenteriara Atlantikaldiaren aurreko asteetan. Hori dela eta, Afrikako eta Europako artista ezberdinek proiektu artistikoak garatuko dituzte, ondoren jaialdian aurkeztuko dituztenak.
Proiektuaren helburua da Europako eta Afrikako ezagutza eta esperientzia trukea sustatzea. Alde batetik, kultur kudeaketa arloko ezagutza eta formazioa eskainiz, eta, bestetik, jatorri ezberdinetako artisten elkarlanaren bidez garatzen diren proiektu artistikoak sustatuz.
Testuinguru horretan, Bobo-Dioulasson (Burkina Faso) ospatzen den ‘In & Out’ jaialdiak Share proiektuko bazkideen urteroko batzarra hartu du Errenteriako Udaleko ordezkari tekniko baten parte hartzearekin. Horrez gain, jaialdian parte hartu duten Togo, Nigeria, Kongo eta Beninetik etorritako artista, kultur eragile eta ekoizleen presentzia baliatuz, Afrikako eta Europako kultur politiken inguruko nazioarteko konferentzia ere izan da bertan. Saio horietan Afrikako eta Europako eragileen arteko kultur harremanak; Afrikako eskualde mailako kolaborazio eta saretzea; edo toki, eskualde edo nazio mailako arte eta kultura sustatzeko politikak aztertu dituzte. Unescoko Arte Bizietarako bulegoak ere parte hartu du bertan.
