Zuhaitz Eguna aurten herrigunean egingo dute
Martxoaren 6an egingo dute aurtengo Zuhaitz Eguna. Altzibar auzoko Kaleberrian bertako platanondoak landatuko dituzte. Familia giroan egin nahi dute.
Martxoko lehenengo igandean egingo dute Oiartzungo Zuhaitz Eguna. Mendialdean egin beharrean kalean egingo dute. Altzibarko Kaleberrian izango da, zehazki. 10:30ean hasiko da martxoaren 6ko ekitaldia.
Oiartzungo Udalak gogorarazi duenez, Zuhaitz Egunaren helburua Kaleberriako ibaiertzeko landaredia berreskuratzea da. Horretarako, han dauden platanondo batzuk kendu eta beste batzuk lepatzen aritu dira eta bertako espeziak aldatuko dira. Batez ere haltzak aldatuko dituzte (Altzibar auzoari izena hortik dator).
Gainera, altzibartarrek Olaldeko bi auzokonposta guneetan sortutako ongarria erabiliko dute zuhaitz berrientzako.
Familia giroan egin nahi dute Zuhaitz Eguna. Arropa erosoa jantzita eramateko aholkatu du udalak.
