"Kalera atera nahi dugu. Bai korri egitera, bai aldarrikatzera"
Lezoko Emakume Korrikalarien taldekoak, beste lezoar askorekin batera, Lilatoian izango dira igandean. Taldekideek lasterketa nola prestatu duten azaldu dute.
Lezoko korrikalaririk ez da faltako igandean Donostian egingo den 32. Lilatoi Lasterketan. Horien artean, Lezoko Emakume Korrikalarien taldekoak izango dira. Bertako arduradun Maialen Pikabeak Lezoko Udalaren komunikazio zerbitzuetarako egin duen elkarrizketan aipatu du gogoz prestatu dutela Lilatoia, eta azaroan taldea martxan hasi zenetik esku artean duten erronkarik garrantzitsuenetakoa dela. “Kalera irten nahi dugu, bai korri egitera, bai aldarrikatzera”, esan du Pikabeak.
Taldekideez gain, Lilatoian askoz lezoar korrikalari gehiago izango direla aipatu du taldearen arduradunak, 40tik gora eta adin guztietakoak. Berez, lezoar emakumeen ahalduntzerako egitasmoko partaideak astelehenero biltzen dira, baina Lilatoiaren prestaketarako astean bitan bildu direla zehaztu du. Hori bakarrik ez: lasterketarako elastiko bereziak egin dituzte.
Iganderako planen berri ere eman du Pikabeak, eta Lezoko emakumeei eskatu die bat egin dezaten haiekin: 08:30ak aldera autobusa hartuko dute Lezon Donostiarantz joateko, eta han argazki erraldoia ateratzeko. Beroketa, Bulebarreko zumba saioan egingo dute, eta probaren ondoren Donostian gelditzea dute asmo. Dena dela, informazio zehatza sare sozialen bidez emango dutela jakinarazi dute.
