Basolanekin jarraitzeko lantaldea osatu du aurten ere udalak
Abenduan hasi ziren lanekin, eta aurtengo kanpainaren asmoa, iaz egindakoari jarraipena ematea da.
Iaz bezala, basolanak eta garbiketak egiteko hiru pertsonako lan taldea osatu du Lezoko Udalak, Oarsoaldearen laguntzarekin. Ingurumen sailak koordinatzen ditu lanak, eta kanpaina 2021eko abenduan hasi, eta apirilean bukatuko da.
Aurreko urtean egindako lanak ekarri ditu gogora udalak, eta horien artean, Altamirako parkeko sasi garbiketak aipatu dituzte. Horrez gain, Gaintxurizketa goiko auzoan egindako garbiketa lanak egin zituztela, eta 107 poligono industrialean bidegorri txiki bat errekuperatu zituztela nabarmendu dute. Bada, aurten, lan horiei jarraipena emango diete.
Altamiraren kasuan linea elektrikoaren azpiko eremu guztia garbitu dute jada, eta hondakin garbiketa sakonak egin dituzte. Era berean, Gaintxurizketa eta Errekaldeko ekarpen gunean sasi garbiketa lanak egin dituzte. Egindako lanekin jarraituz, Ipintzan hondakin garbiketak eta espezie inbaditzaileak kendu dituzte; guztira hiru edukiontzi bete dituzte.
Jaizkibel mendian ere aritu dira, eta bertako lehenengo eta bigarren dorrearen artean dagoen eremu bat txukundu eta landaketak egin dituzte. Zehazki, 50 landare eta zuhaixka landatu dituzte, bioaniztasuna handitzeko helburuarekin.
