Pirinioetako Bidea Oiartzunen lantzen hasteko hitzordua jarri du Gure Eskuk
Larunbatean Oarsoaldeko aurkezpenera joateko gonbita egin dute, eta asteazkenean Oiartzunen "lur hartzen joateko" batzarra.
Gure Eskuk, Kataluniako hainbat eragilerekin batera, Pirinioetako Bidea antolatu du uztailaren 2rako. Helburua bi herriak lotzen dituen mendikateko 300 gailur argiztatzea izango da. Erabakitzeko eskubidearen aldeko mobilizazio jendetsua egin nahi dute.
Urtarrilean eman zituzten erronkaren xehetasunak.
Euskal herritarrek 115 gailur argiztatuko dituzte, Jaizkibeletik Benasquera, eta haietara joateko izen ematea zabalik dagoela gogorarazi dute. Horretarako, Gure Eskuren webgunera jo beharko da.
Egitasmoaren berri emateko, Oarsoaldeko aurkezpen ekitaldia antolatu dute larunbaterako, hilak 19. Errenteria-Oreretan izango da, Niessen kulturgunean. 12:00etan hasiko da ekitaldia.
Oiartzunen ere antolatu dute saio bat, datorren asteazakenerako, hilak 22. Pirinioetako Bideak herrian “lur hartzeko” —horrela definitu dute hitzordua— antolatu dute. Udaletxeko pleno aretoan elkartuko dira, 19:00etan.
Askotariko gailurrak
300 gailur horietako gehienak “berdeak” dira, edonork igotzeko modukoak, baina badaude “gorri” direnak ere. Zailtasun handiagoa duten gailur horietarako eskarmentudun mendizaleen bila ari dira, eta e-posta bidez eman beharko dute izena.
Mendi zailenak Erdialdeko Pirinioetan badaude ere, Aiako Harria —esaterako— gorriz dindatu du Gure Eskuk. Oiartzuarrei dagozkien mendiak Bianditz eta Errenga izango dira.
Izena emateko, datozen asteetan hainbat mahai jarriko dituzte herrian. Erronka horrekin lotutako materiala erosteko aukera izango da horietan, eta online ere eros daitekeela gogorarazi dute.
