Euskara eta ingurumenaren arteko lotura aztertuko dute, txango batekin
Luis Mari Zaldua euskalariak Oieleku ingurutik ibilaldia gidatuko du, eta pertsonen eta naturaren arteko elkarrekikotasuna erakutsiko du.
Oieleku inguruan egingo dute ibilbidea [Arg. Gipuzkoako Foru Aldundia]. Gipuzkoako Parketxe Sareak antolatuta, ibilaldi gidatua egingo dute datorren larunbatean, hilak 26. Oieleku inguruan izango da, eta hizkuntza eta naturaren arteko lotura erakustea izango da helburua.
Luis Mari Zaldua Etxabe euskalariak emango ditu azalpenak. Tokien izenak nahiz klimak eta urtaroen gorabeherek izaki bizidunetan duten eragina adierazten duten esaera zaharrak izango dira horren erakusle.
Hainbat gai landuko dituzte: paisaiaren xehetasunak, lekuen deizioak, landareen izenak, urtaroei buruzko esaerak, koloreen ñabardurak, ahozko tradizioa, gizakiaren urratsa… Ingurumenarekiko errespetua eta natura aintzatestea izango dira txangoaren helburuak, hizkuntzarenarekin lotuta.
Kausoko aparkalekuan geratuko dira, 10:00etan. Txangoak hiru ordu inguru iraungo ditu, eta 5 euroko prezioa izango du. Aldez aurretik eman beharko da izena, e-posta bidez edo telefonoz deituta (943 49 50 69). Ibilbidea edonork egiteko modukoa dela nabarmendu dute antolatzaileek.
