PSE-EEk Beraungo gune kulturalaren atzerapena kritikatu du
"Espazio gehiena udaleko bulegoetarako" erabiliko dela salatzen dute sozialistek.
Isaac Palencia, Errenteria-Oreretako PSEko burua, eraikinaren aurrean. PSE-EEk bere kezka adierazi du Beraungo gune kulturalaren egoerarekin. Sozialisten ustez aldaketa nabarmenak egon dira proiektuaren definizioan: “2015ean Beraungo auzoarentzat liburutegia izatetik, 2019an gune kulturala izatera pasatuz, azkenean gune sozialean amaitzeko 2021ean”. Isaac Palencia PSE-EEko bozeramalearen esanetan “hori dena ezkutatzeko espazio gehiena udaleko bulegoetarako erabilia izango dela”.
PSE-EEk jakitera eman du 2015etik dabilela Aldakonea eskolaurrea gune kultural batean bihurtzeko proposamena egiten. Talde sozialistak auzoarentzako espazio komunitarioen zerbitzuak emateko, eta Herritarrenganako Arreta Zerbitzua eta Udaltzaingoaren arreta lehiatila ezartzea proposatzen du.
Sozialistek udal gobernuaren kudeaketa “negargarria” dela salatzen dute, eta Barandiaran parkea, kiroldegiaren handitze prozesua, pertsona helduentzako etxebizitzak, Beraungo eta Gaztañoko igogailuak eta Iztietako gune degradatua aipatzen dituzte adibide gisa.
