Test estropada eta egun osoko giroa, larunbatean San Pedron
XIII. San Pedroko Jaitsierako test estropada girotzeko arratsalde osoko egitaraua prestatu du Sanpedrotarra Arraun Elkarteak.
San Pedroko test estropada 16:30ean hasiko da. 
Sanpedrotarra Arraun Elkarteak test estropada antolatu du datorren larunbaterako, hilak 26. Arratsaldeko norgehiagoka girotzeko, gainera, ia egun osoko egitaraua prestatu dute. Horra hor:
- 13:00etan, sasoiko kamiseta berriak diseinatzeko logoa aukeratuko dute, arraun elkartearen egoitzaren aurrean.
- 14:00etan, bazkaria arraun elkartean. Menuak 20 euroko prezioa izango du, eta erreserbak telefono honen bitartez egin daitezke: 606 86 12 75 (Itziar).
- 16:30ean, XIII. San Pedroko jaitsiera, test estropada.
- 17:00etan, sardinada eta saiheskia, Torrean.
- 20:00etan, musika kaleetan zehar, Iraunkorrak txarangaren eskutik.
Estropada
Estropada erlojuz kontra jokatuko da, banaka eta irteerak minutuero burutuko direlarik. Haur, Beterano eta Senior neskek bi luze eta ziaboga bat egin beharko dituzte, eta Senior mutilek, aldiz, lau luze eta hiru ziaboga.
Traineruak hiru multzotan banatuko dituzte, txanda bakoitzaren artean 5 minutuko geldiunea egingo dutelarik. Honako dokumentu honetan zehaztu du Sanpedrotarra Arraun Elkarteak parte hartzaileen zerrenda eta informazio esanguratsua.
