Mindarako hiru pilotari izango dira pilota egokituko finalean
Adimen urritasuneko palaz binakako final handia igandean izango da Eibarko Astelena pilotalekuan, eta ETB1en ikusi ahal izango da, 12:00etan.
Astelena pilotalekuan jokatuko dira finalak. Argazkia: Eibarko Udala. Euskal pilota egokituko 2022ko sari nagusiko finalak jokatuko dira igandean, hilak 3, Eibarko Astelena pilotalekuan. Finalean adimen urritasuneko eta urritasun fisikoko pilotariak lehiatuko dira, eta adimen urritasuneko finalari dagokionez, Errenteria-Oreretako Mindara Elkarteko hiru pilotarik jokatuko dute palaz binaka. Alde batetik, Mindarako Eneko Sagarmendi Lorea Iribar zarauztarrarekin batera ariko da final handian, eta euren aurkariak Mindarako Sheila Cueto eta Iraitz Huegun pilotariak izango dira.
Bi bikoteak momentu onean iritsi dira finalera euren partida guztiak irabazi ondoren. Sagarmendik eta Iribarrek 15-5 irabazi zuten euren finalerdia, eta Cueto eta Huegunek, berriz, 15-10. Finala, ordea, 25 tantoratara izango da. Eneko Sagarmendik nabarmendu du “oso partida gogorra” espero duela: “Iraitz oso ondo ezagutzen dut, ohitua nago bere kontra jokatzen. Partida oso gogorra izango da”.
Sagarmendi Lorea Iribar zarauztarrarekin batera ari da jokatzen txapelketa, eta onartu du “oso ondo moldatzen” direla. Horrez gain, Mindarako pilotariak baietsi du “fisikoki oso ondo” iristen dela eta finalera begira “oso animatua” dagoela.
Final handia ETB1en ikusi ahal izango da 12:00etan. Aurtengo finalerako hautatu den frontoia profesionalen munduan garrantzitsuenetakoa den bat da: Eibarko Astelena pilotalekua. Sagarmendik baieztatu du “poz handia” suposatzen duela horrelako pilotaleku batean lehiatzea, “ez nuen espero finala profesionalak aritzen diren frontoi batean jokatzea”.
Denboraldi biribila
Sagarmendi daraman sasoi onari jarraipena ematen ahaleginduko da. Aurtengo denboraldian hiru txapelketa irabazi ditu jada, eta gehiago nahi du. Igandean izango du palmaresa handitzen jarraitzeko hurrengo erronka.
Azken txapela duela bi aste lortu zuen banakako txapelketan, Idiazabalen Mindarako Iraitz Huegun menpean hartuta. Igandean nor baino nor ariko dira berriro.
