[Erreportajea] Pausoz pauso, «hitzarmen duin bat» lortu arte
Pasaiako etxez etxeko langileak kexu dira. Exijitu zaien formakuntza ez dator bat ordainarekin, eta hamar urte daramatzate egoera berean. «Bizi baldintza duinak» nahi dituzte.
44 emakume dira, eta eskakizun irmoa dute: «Hitzarmen duin eta propio bat sinatu nahi dugu, zeinak gure baldintza ekonomiko eta pertsonalak babestuko dituen, gure bizi baldintzak duinduz». Pasaian etxez etxeko laguntza ematen duten langileek hamar urte daramatzate soldata berberarekin, eta kalera atera dira egoera sostengaezina dela salatzeko, gutxieneko soldata baino «zertxobait gehiago» kobratzen dutela gaitzetsi baitute, «beste sektoreekiko soldataren aldea sekulakoa da».
Euren ogibidea zertan den galdetuta, hala mintzatu dira: «Pertsonei etxez etxeko laguntza zerbitzua eskaintzea, bizi kalitatea hobetzeko asmoz, nork bere etxebizitza utzi beharrik gabe». Bizitokian bertan arreta soziosanitarioa ematen diote erabiltzaileari; adineko jendea edo nolabaiteko menpekotasuna duten norbanakoak izan ohi dira eskatzaileak.
Zerbitzu hori eskaintzeko, jakina, formakuntza espezifikoa exijitu zaie lehenengo, baina eskakizun hori ez dator bat, haien arabera, gero ordainetan eman zaienarekin. «Langile profesionalak gara», aldarrikatu dute, «gure lana primeran ezagutzen dugu, baina Eraikin eta Lokalen Garbiketaren Hitzarmena aplikatzen zaigu».
Bi aldeko auzia
Alde biko negoziazioa eskatzen du haien aldarriak, zerbitzu publikoa baita eskaintzen dutena eta, horrezkero, Pasaiako Udala da arduradun nagusia. Langileen kudeaketa, ordea, Eulen enpresaren esku dago. «Enpresa pribatuek beraien irabaziak lehenesten dituzte, langileen eta zerbitzuaren gainetik», salatu dute.
Egoera hori izanik, kaleak hartzeko derrigortasunean ikusi zuten langileek euren burua, eta aldarria Antxoko barrutian zehar hedatu zuten martxoaren 13an. Haratago egin zuten, gainera, joan den astearteko osoko bilkuran, hamazazpi zinegotziei parez pare jarri baitzieten pankarta «hitzarmen duin bat» galdeginez.
Gaurdaino zenbait zinegotzi kolektiboarekin jarri dira, jada, harremanetan, eta bilkurak egin dituzte. Epe laburrean, auziaren beste partea interpelatzea dute asmo: «Hurrengo pausoa Euleneko enpresa komitearekin elkartzea da».
