Abaraxka Ibiltariak oporraldirako zortzi jarduera eskainiko ditu
Jai egun ofizial ez diren egunetarako ekintza bana prestatu dute. Saio guztiak doakoak eta irekiak izango direla aurreratu dute.
Puzgarriak izango dira egitarauko lehen jarduera. Ikasleek udaberriko oporraldia hasiko dute bihar, eta hori dela eta, Abaraxka udal ludotekak zortzi jarduera antolatu ditu. Hilaren 11tik 13ra, eta 19tik 23ra izango dira ekintza horiek; jai egun ofizialak ez diren egunetan, alegia.
Saioak LH 1 eta 6 mailen arteko haurrei zuzenduta daude. Ludotekaren balio eta filosofia hezitzailearekin bat egiten dute jarduera guztiek. Modu berean, herriarekin oso lotuak egongo dira: elkarlana, herriaren ezagutza, herriko kultura, natura eta ingurumena, kontsumismoari alternatiba…
Saio gehienak ludotekan egingo badituzte ere, Ergoienera, Iturriotzera eta Karrikara egingo dituzte txangoak.
Herriko eragileekin elkarlanean ere arituko da ludoteka egun batzuetan, hala nola Itturri merkatarien elkartearekin eta Soinuenearekin.
Antolatutako jarduera guztiak doakoak eta irekiak izango dira. Hau da, parte hartzeko ez da nahi eta nahi ez ludotekako bazkide izan behar.
Informazio gehiago lor daiteke ludotekaren webgunean edo e-posta helbidera idatzita.
Egitaraua
- Hilak 11, astelehena: Puzgarriak (Elorsoro kiroldegian, 11:00-13:00 / 16:30-19:00). Haur Hezkuntzako haurrek ere parte har dezakete.
- Hilak 12, asteartea: Truke jolasa (Abaraxka ludotekan, 16:30).
- Hilak 13, asteazkena: Mendi buelta (Abaraxka ludotekatik, 10:30).
- Hilak 19, asteartea: Oiartzun ezagutzen: Karrika (Abaraxka ludotekan, 16:30).
- Hilak 20, asteazkena: Putzu-plast (Abaraxka ludotekan, 16:30).
- Hilak 21, osteguna: Oiartzungo ondarea ezagutzeko pista jolasa (Abaraxka ludotekan, 16:30).
- Hilak 22, ostirala: Txalaparta tailerra (Soinuenean, 16:30).
- Hilak 23, larunbata: Liburuaren Eguna (Abaraxka ludotekan, 16:30).
