ABB-Niessengo langileak zoriondu ditu LABek, akordioa babestegatik
"Bizitza erdigunean jartzeko" pausoak eman dituztelako zoriondu dituzte. Bozketaren emaitza "argia" izan dela nabarmendu dute.
ABB-Niessen fabrika, Aranguren industriagunean. ABB-Niessen enpresan akordiora iritsi dira langileak eta zuzendaritza. Horren harira, LABek oharra argitaratu du, langileak zoriontzeko asmoz. Lau ordezkari dituzte enpresa batzordean, ELAk hiru eta UGTk bi.
Hiru urterako ituna adostu dutela jakinarazi du LABek, eta xehetasunak eman ditu. Soldata horrela igoko da, urteka. Horrela azaldu du sindikatuak:
-
2021: 300 euroko igoera lineala eta kontsolidagarria. 2021ko urtarriletik kontuan hartuko dena (KPI negatiboa izan zen 2020an).
-
2022: KPI igoko da(%6,5).
-
2023 urterako: KPIa bermatzen da, eta KPIren zenbatekoaren arabera igoera gehigarri bat adosten da KPI+%0,5 artekoa izan daitekeena (%6tik beherako KPI bada). %6tik gorakoa bada KPI, eta enpresaren gutxieneko helburuak beteko ez balitu eta salmentak gutxituko balira, berriro negoziatuko litzateke soldata igoera.
Horrez gain, euren “aldarrikapenik garrantzitsuena” lortu dutela azaldu dute: adindez nagusiago diren langileentzako gauak murrizteko aukera martxan jartzea.
Enpleguari dagokionez, honakoa lortu dute: “Ekoizpeneko lanpostuen mantentzea: errelebu kontratua bermatuko da, eta errelebistak ekoizpenean sartuko direla adostuko da”.
Bajak %100an osatuko direla iragarri dute, baita ituna iraungi eta aurrera begira ere. Horrez gain, Gipuzkoako metaleko hitzarmenarekiko lotura bermatu dela adierazi du sindikatuak, enpresa itunean jasotzen ez dena “automatikoki aplikatuz”.
“Inoizko parte-hartzerik handiena”
“ELA sindikatuak akordioaren kontra egin zuen arren, eta kontrako bozka eskatu, batzarraren emaitza argia izan da: 118 baiezko boto eta 29 ezezko”, adierazi dute. Bozketan parte hartu duten langileen kopurua “inoizko handiena” izan dela ziurtatu dute, %80 gaindituta.
“Niessengo langileak zoriondu nahi ditugu LABetik, erakutsi dutelako aberastasunaren banaketa beharrezkoa dela eta baita ere bizitza erdigunean jartzeko pausoak eman dituztelako”, gaineratu dute.
2008 eta 2019 urteen artean langileen eroste ahalmena jaitsi dela gogorarazi dute, eta Barne Produktu Gordinean ere gero eta gutxiago direla soldatei bideratzen zaizkien kopurua. “Horregatik”, esan du LABek, “soldatak KPIaren arabera eguneratzea ezinbestekoa da, gizartearen pobretzea ekiditeko. Oinarrizko produktuen garestitze izugarria (KPI baino askoz handiagoa) zuzen zuzenean pairatzen dugulako langileok”.
