Oiartzungo pilotariak hiru modalitatetan arituko dira herriartekoan
Maiatzaren Leheneko asteburuan hasiko da eskuzko txapelketa. Gomazko paleta, eta pala motza eta larruzko paleta batzen dituen lehen jardunaldia, maiatzaren 8an.
Atzo aurkeztu zuten aurtengo txapelketa, Anoetako Kirol Etxean. Gipuzkoako Herriarteko Pilota Txapelketa aurkeztu dute. Oiartzunek parte hartuko du, aurten ere bai, txapelketa horretan. Lau modalitateetako hirutan arituko dira.
Eskuzkoan arituko dira, beste hamasei udalerrirekin batera. Lehenengo arerioa Zaldibia izango da, eta haien etxean jokatuko dute joanekoa. Maiatzaren Leheneko asteburuan izango da.
Beste modalitateetako lehiak maiatzaren 8ko asteburuan hasiko dira. Pala motza eta larruzko paleta tartekatzen dituen modalitatean bederatzi izango dira lehian arituko diren herriak. Andoain izango da lehenengo arerioa. Buruntzaldeko herrian jokatuko dituzte joanekoak.
Oiartzuarrek iaz ez zuten gomazko paletako modalitatean parte hartu. Guztira hamabost lehiakide izango dira. Oiartzuarrak —kasu horretan ere bai— Andoainen kontra arituko dira; joaneko partidak Madalensoron izango dira.
