Adingabeak subjektu politiko bihurtzeko lanean da Pasaiako Udala. Horren barruan, bertatik bertara ezagutu dituzte 100 gaztek zenbait udal ardura eta zinegotziekin elkartu dira gero, dituzten premien berri emateko.
Udal arduradunekin elkartu aurretik, zerbitzuen pabiloia [argazkian] eta udaletxea bisitatu zituzten ikasleek. [Argazkia: Iñaki Berrio]. 
Gertuagotik ezagutzen dituzte orain Pasaiako hiru ikastetxeetako haur eta nerabeek udal ardurak; izan ere, joan den hil bukaeran bi bisita egin baitzituzten Karmengo Ama, Pasaia-Lezo Lizeoa eta La Anunciatako 100 bat eskolatuk Pasaiako Udaleko Zerbitzu, Mantenu lan eta Sareen sailaren pabiloira, bertoko langileen egunerokoa bertatik bertara ezagutzeko. Horren aurretik, gainera, Arizabalo Jauregian —udaletxea— bisita gidatua egin zuten LH eta DBHko eskolatuek, alkate eta zinegotziekin batera, eraikin nagusiko sailak gertutik ezagutzeko.
Zerbitzu horietako langileek haur eta nerabeei azaldu zieten zer-nolako ardurak dituzten, eta horiek konplitzeko erabiltzen dituzten zenbait gailu probatzeko aukera ere izan zuten pabiloian. Besteak beste, gertuagotik ezagutu ahal izan zituzten adingabeek kaleen garbiketa, zaborraren kudeaketa, herri altzarien konponketak, argiteria zerbitzuak edota lorezaintzari loturiko egitekoak.
Euren kezka eta ezinegonak ere eraman zituzten topaketara, bai eta etorkizuneko Pasaia haien neurrira diseinatzeko dituzten proposamenak ere. Horiek guztiak udalbatza osatzen duten zinegotziei helarazi zizkieten, aurrez aurre.
Gazteen kezkei, erantzun politikoa
Hiru multzotan banatu ziren ikasleak: antxotarrak, sanjuandarrak, eta trintxerpetar nahiz sanpedrotarrak. Horietako bakoitzean bi zinegotzi eta zenbait udal teknikari —bakarra batzuetan eta bina besteetan— eseri ziren, adi-adi euren galderak entzun eta horiei erantzuten ahalegintzeko.
Antxotarren kezka nagusia topoaren obrak izan ziren; gazteei horiek nola eragingo dieten azaldu zien Izaskun Gomez alkateak. Biteri plazaren eraberritzea, segurtasuna eta handiagoentzako jolas parkeak ere izan zituzten hizpide, besteak beste. Anunciata eta Lizeoko ikasle antxotarrek gazteentzako jolas eremu berria sortzeko eskatu zuten. Olaia Gerendiain
Trintxerpe-San Pedro taldean aurrekontuekiko kezka agertu zuten ikasleek, eta aspalditik dakarten eskaera bat ekarri zuten gogora: gune estali gehiago behar dituzte kalean egon ahal izateko. Trintxerpeko Aranederreko pistetan gazteentzako espazio bat nahi dute Karmengo Ama eta Lizeoko ikasleek. O.G.
Donibanen kirol pista bat eskatu zuten DBHkoek, eta zuntz optikoa noiz helduko ote zaien galdetu zieten arduradun politikoei. Mugikortasuna hobetu eta bidegorria buka dadin ere funtsezkotzat jo zuten haur nahiz gazteek. Kirol pista berri baten beharra helarazi zieten gazte sanjuandarrek udal arduradunei. O. Gerendiain
