Bihar hasiko dira Olazar ibaiko obrak
Eugenio de Ochoa kaletik pasatzen den Olazar ibaiko estaldura kendu eta ingurua naturalizatuko dute lan horiekin.
Olazar ibaian obrak hasiko dituzte bihar. Atzerapenarekin, baina Eugenio de Ochoa kaletik pasatzen den Olazar ibaiko estaldura kendu eta ingurua naturalizatzeko obrak hasiko dituzte bihar, eta lan horiek hiru hilabeteko epean bukatzea aurreikusten da. Hala, hamaika platanondo moztu, eta lanak hasteko prestaketekin hasiko dira bihar bertan.
Proiektuaren helburua da Olazar errekan estalduriko ibai tarte baten sekzio eskasia konpontzea, ibilgua naturalizatuz, sekzioa aire zabalean hondeatuz, eta ibai tartearen ahalmen hidraulikoa hobetuz; hala nola, ibaiaren ingurumena leheneratzea ahal den neurrian.
Lan horiek Lezoko Udalak eta Uraren Euskal Agentziak sinatutako lankidetza protokoloaren baitan garatuko dira. 2020ko otsailean sinatutako hitzarmenak, hain zuzen, Lezoko ur ibilguen hobekuntza eta kudeaketa ditu xede. Herriko hainbat puntu ikuskatu ondoren, URAk lehentasunezkoa jo zuen erreka zati horretan estaldura kentzea.
Lan horiek uholdeak ekiditea dute helburu, eta inguru horretan dauden garajeetako ur filtrazioak ekiditeko lagungarri izan daitezke. Hortaz, herriarentzat hobekuntza bat suposatuko dute.
Aldaketak
Ibilgu berriaren ibilbidea definitzeko orduan, egungo espaloiarekin lerrokatzen saiatuko dira, ahal den neurrian kalearekiko eragina txikiena izan dadin. Eragina mendebaldeko aparkaleku eta espaloian izango da soilik. Aparkalekuak bateriatik lerrora pasako dira, eta 0,70 metroko zerbitzu espaloia eraikiko da.
Errekari sei metroko zabalera emango zaio, eta horretarako bertan dauden hamaika platanondo kendu beharko dituzte, baina aldi berean, ibai ertzetako zuhaitz eta zuhaixkak landatuko dira errekaren bi aldeetan. Ezkerraldeko ertzean buztinezko geruza bat jarriko da ur filtrazioak ekiditeko helburuarekin.
Obrak irauten duten bitartean, bertako bizilagunek Algeposan aparkatzeko aukera izango dute, baina aldez aurretik baimena eta giltza eskatu beharko dituzte.
