Arrandegi kalea moztuta eta aparkalekurik gabe, gutxienez astebetez
Asfaltatze lanak medio, datorren astelehenetik hurrengora arte (maiatzak 1) ezingo da ez autoz ibili ez aparkatu kale horretan.
Trafikoa erabat moztuta egongo da Arrandegi kalean, eta ezingo da bertan aparkatu ere. 
Arrandegi kaleko asfaltatze lanak datorren astelehenean (hilak 25) hasiko direnez, trafikoa erabat moztuko da kale horretan, eta lurgaineko aparkaleku guztiak kenduko dituzte gutxienez astebetez, lanak guztiz bukatu arte.
Epe horretan, barrutiaren goialde osorako irteera Azkuene kaletik (Andonaegi-Ulia Etorbidea-Azkuene korridorea) egin beharko dute ibilgailuek. Gudari plazatik sarbidea duten Serafin Esnaolako garajeetara sartzeko, eta bertatik irteteko, bidea egokituko da kale horretatik; eta Terranoba kalea norabide bikoitzekoa izango da, soilik bertakoentzat.
Eragindako eremuan garajea duten bertakoak 20:00etatik 08:00etara bitartean sartu eta irten ahal izango dira; udatzaingoaren arabera, “lanean ari ez direnean eta zirkulaziorako arriskurik ez dagoenen uneetan”, hain zuzen. Tarte horretan ere unean-uneko argibideak eta seinaleak bete beharko dituzte.
Pasaiako Udaltzaingoak ohartarazi du zamalanak egin behar dituzten establezimendu edo negozioek aldez aurretik jakinarazi beharko dituztela euren beharrak, eta une horretan ezarritako erabilgarritasunaren arabera sartu edo irten ahal izango dira.
