Etxeak uzteko lehen gutunak jasotzen hasiak dira Arramendiko bizilagunak
Alokatze-kontratuen iraungitzearen berri emateko lehen jakinarazpenak jaso dituzte, dagoeneko, Pontikako hainbat bizilagunek.
Arramendi pasealekuko 3, 5 eta 7 atarietan bizi diren bizilagunak dira etxegabetze arriskuan daudenak. Hilaren 16ean iraungi zen Eusko Jaurlaritzako Etxebizitza Sailak Jaureguizar enpresa eraikitzailearekin duela 15 urte sinatutako hitzarmena, aukera emanez Pontikako Arramendi pasealekuko 3, 5 eta 7 atarietako etxeak -gaurdaino babes ofizialeko alokairuan egondakoak- salgai jartzeko. Euren alokatze-kontratuen baliogabetzearen berri emateko jakinarazpenak jasotzen hasiak dira bertoko bizilagunak.
Alfonso Gabarri 3. atean bizi den bizilagunarekin izan zen HITZA joan den hilabetean eraikin horietan bizi diren 30etik gora familien egoeraren berri izateko. Orduan esan zuen alokatzaileek etxebizitza horiek erosteko baliabiderik ez zutela, eta “kale gorrian” geratuko zirela alokairuak luzatu ezean. Gaur, kontratu horiek iraungitzen hasiak direnean, egoera ez da aldatu.
Bizilagun bakoitzak epe propioak ditu, sinatze dataren baitakoak; Gabarriri ekainean bukatuko zaio alokatzeko eskubidea, baina argi du hark, langabezian dagoen emaztea eta lau seme-alaba izanik, alde egingo ez duela. “Gu ez goaz inora”, irmo adierazi zuen joan den hilabetean, eta gaurkoan berretsi du: “Nora joan ez dugu eta ezin dugu kalean gelditu”.
Hark ez du oraindik abisu gutuna jaso, baina jakitun da, hori postontzian topatzen duenetik aurrera, edozein momentutan heldu ahalko zaiola etxegabetze-agindua. Lehen jakinarazpenak -ekainean jasoko duenak- alokairuaren bukaeraren berri eman eta erosteko aukera eskaintzen duela azaldu du bizilagunak. “Tira, aukera, zerbait esatearren, etxerik erosteko aukerarik ez baitugu hemengook”.
Pilota, Eusko Jaurlaritzaren eta Errenteriako Udalaren teilatuan
Hil hasieran eman zuen aditzera enpresa sustatzaileak bizilagunen ezinegona partekatu ez ezik, kasu bakoitza “banan-banan” aztertuko zuela, gaiari ahalik eta irtenbide aproposena emateko.
Horrez gain, Jaureguizarrek jakinarazi zuen bai Eusko Jaurlaritzari zein Errenteriako Udalari eskaini ziela etxe horiek erosteko aukera, gaur artean bizilagunek izan duten babespeko alokairua haiek kudeatzeko. Hemen irakur daitezke jabeak hedabideetara helarazitako oharraren detaileak.
