Ed Wood zinema zuzendariari omenaldia egingo dio OzZinemak
Tim Burtonek zuzendutako filmak historiako zuzendari txarrenaren irudian jartzen du fokua, eta bihar ikusi ahal izango da Niessenen, 19:30ean.
Ed Wood filma. OzZinema zineklubak ‘Zineman Zinema’ hiru saioko zikloari ekingo dio bihar. Proiektutako den lehen filma Tim Burton zuzendari ospetsuaren ‘Ed Wood’ da, Johnny Deep aktore famatuak interpretatzen duena.
Ed Wood zinema zuzendari gaztea da, prestakuntza akademikorik gabeko ameslaria, emakumez janzten zalea eta estudio handi batean filmak egiteko aukera gutxi dituena. Hala ere, ez du amore ematen zuzendari ospetsu bihurtzeko ahaleginean. Pertsonaia talde bitxi bat bildu ondoren, aurrekontu txikiko filmak egiten ditu, xelebreak eta teknikoki oso zainduak ez direnak.
‘Ed Wood’ Tim Burtonen film onenetarikoa dela diote askok. 1994an egina, zinemaren historiako zuzendari txarrenaren irudia eta ondarea omentzen ditu Burtonek. ‘Ed Wood’ ez da ohiko film biografiko bat, zinemari omenaldi argia egiten baitio bere figura gutxietsienetako baten bidez.
Gidoiaren arreta Wooden hiru film ezagunenetakoen proiekzioetan jartzen da: ‘Glen or Glenda’, ‘Bride of the Monster’ eta ‘Plan 9 from Outer Space’. Burtonek Wooden izaera baikorra eta berezia aztertzean jartzen du begirada, eta, batez ere, bere bizitzako azken urteetan Bela Lugosirekin aktorearekin elkartu zuen adiskidetasunean.
Hollywoodek bere urrezko urteei begiratzen dien artifizialtasunetik ihes egiteko, filma zuri-beltzean filmatu zen, iraganeko eta ahaztutako garai baten espirituari ahalik eta leialen izateko.
‘Ed Wood’ ‘Zineman Zinema’ zikloaren barruan proiektatuko den lehen filma da, baina ez azkena. Bigarrena, ‘Bowfinger’, maiatzaren 10ean izango da, eta, azkena, ‘The Disaster Artist’, ekainaren 14an.
‘Ed Wood’ bihar ikusi ahal izango da Niessen zinema aretoetan, 19:30ean. Sarrerak hiru bidetatik lortu ahal izango dira lau euroko prezioan: https://sarrerak.errenteria.eus/ webgunean, Lekuona Fabrikan, eta Niessen Kulturguneko leihatilan saioa baino ordubete lehenago.
