[Galeria] Ikastoletako ikasleek Picassoren 'Gernika' margotu dute goizean
Milimetroak martxan dira, eta goizean 100 ikaslek Gernika koadroa margotu dute. Arratsaldean musika eta dantza izango dira protagonistak.
Ikasleak Picassoren Gernika margotzen. Milimetroak martxan dira dagoeneko, eta ikasleak hasi dira egun osoko jarduerak osatzen. Goizeko ekintza nagusia Picassoren Gernika koadroaren margoketa izan da. Gernikako bonbardaketen 85. urteurrenean, Orereta Ikastolako, Haurtzaro Ikastolako, Pasaia-Lezo Lizeoko eta Ibarrako Uzturpe Ikastolako DBH 3 eta 4ko 100 ikasle Errenteria-Oreretako Linoko plazan elkartu dira, denen artean koadro erraldoia margotzeko.
Ikasle horiek lau taldetan banatu dituzte, 25 ikasle talde bakoitzean, eta elkarlan eta kooperazioaren bidez koadroa egin dute. Margolana osatzeko, lehenik eta behin, ikasleek oihal handi batean trazua marraztu dute, eta ondoren, margoketari ekin diote.
Goizeko ekintza nagusia osatua, ikasleak Jautarkol plazara abiatu dira artelana aurkezteko, goizak emandakoa elkarbanatzeko eta horren inguruko gogoeta bat egiteko. Ekitaldi hori 14:30ean bukatuko da, baina ekintzak ez dira hor etengo, arratsaldean izango baitute jarraipena. 19:00etatik aurrera, Herriko Plazan, dantza eta musika izango dira protagonistak, eta ikasleek musika eta antzerkia uztartzen dituen saio bat prestatu dute. Horrez gain, arratsaldeko jardueretan herriko zenbait eragilek hartuko dute parte, hala nola, Kukai Dantzak, Haritza Itzala jazz taldeak, Mikel Urdangarin abeslariak edo Andoitz Antzizar trikitilariak.
