Jon Bautista IV. campusa, prest
Touringek Jon Bautista campusa antolatu du udarako eta izen-emateak irekita daude dagoeneko. Ekainaren 24tik uztailaren 21era izango da.
Jon Bautista campuseko haurrekin. Uda gainean dago, eta aurten ere Touring Kirol Elkarteak Jon Bautista campusa antolatuko du. Honakoa izango da kirol anitzeko udalekuen laugarren edizioa, eta irteerak, jolasak eta ekintza ezberdinak egingo dituzte parte hartzaileek. Campusa 2008 eta 2013 urteen artean jaiotako gazteei bideratuta dago.
Campusa ekainaren 24tik uztailaren 21era izango da, 09:00etatik 13:30era, Fanderiako futbol zelaian, eta izena asteka emateko aukera dago:
- 1. astea: ekainaren 24tik ekainaren 30era.
- 2. astea: uztailaren 1etik uztailaren 7ra.
- 3. astea: uztailaren 8tik uztailaren 14ra.
- 4. astea: uztailaren 15etik uztailaren 21era.
Izen-emateak bi modutara egin daitezke. Izen-emate orria, ordainketa ziurtagiriarekin eta partaidearen Osakidetzako txartelarekin batera, campusatouringke@gmail.com helbidera bidal daiteke. Klubetik zehaztu dute nahikoa izango dela datuak argi ikus daitezkeen argazkiak bidaltzea.
Horrez gain, aurrez aipatutako dokumentazioa Touringek Morrongilleta 8 behean duen bulegoan ere entrega daiteke. Bulegoa astelehenetik ostiralera dago irekia, 10:00etatik 12:00etara.
Izen-emate orrian gazteek zaintza zerbitzua beharko duten galdetu du klubak, eta beharra duten gazteen kopuruaren arabera zerbitzu hori eskainiko dutela azaldu dute. Edozein zalantzarekin, interesdunek campusatouringke@gmail.com helbidera idatz dezakete.
