Mende erdiaren ondoren, Pasaian berriro Espainiako Batel Txapelketa
1973an lehiatu zen azken aldiz estropada hori badiako uretan. Denera 80 ontzi uretaratuko dira datozen larunbat eta igandean Donibanen.
Ezkerretik eskuinera, Asuncion Loriente, Harkaitz Millan, Elias Arruebarrena, Imanol Garmendia, Lore Suarez eta Joxean Giron. 
Datorren asteburuan, larunbat eta igandean, 2022ko Espainiako Batel Txapelketa lehiatuko da badiako uretan. Lehen jardunaldian sailkapen estropadak jokatuko dira 10:30etik aurrera, eta igandean 10:00etatik aurrera, finalak.
Igandeko estropada bi multzotan banatu dute. Lehendabizi B mailako finalak lehiatuko dira, 10:30etik aurrera, eta ordubete geroago, 11:30ak aldera, A mailako ontziena izango da norgehiagoka.
Denera 80 batel uretaratuko dira, horietatik 12 gipuzkoarrak. Haurretatik hasi eta Absolutuen kategoriara arteko maila guztiek izango dute ordezkaritza, neska eta mutil arraunlariak egongo direlarik, halaber, horietako bakoitzean lehian. Haurrek 1.000 metroko distantzia egin beharko dute; 1.500 metrokoa Kadeteek; eta 2.000koa Gazte nahiz Absolutu kategorietako arraunlariek.
Euskadiko eta Espainiako Arraun Federazioek bat egin dute San Juan-Koxtape Arraun Elkartearekin estropada antolatzeko, eta horren nondik-norakoak aurkeztu dituzte gaur bertan, arrosen Donibaneko egoitzan. 1973an lehiatu zen azken aldiz estropada hau Pasaiako uretan, eta bereziki hunkituta agertu dira ordezkariak, 49 urteko parentesiaren ondoren, berriro biziko dutelako etxean txapelketa handia.
Joxean Giron, Pasai Donibane Koxtape Arraun Elkarteko ordezkaria; Lore Suarez, Pasaiako Udaleko lehen alkateorde eta Kirol zinegotzia; Harkaitz Millan, Gipuzkoako Foru Aldundiko Kultura, Lankidetza, Gazteria eta Kirol diputatua; Asuncion Loriente, Espainiako Arraun Federazioko presidentea; Imanol Garmendia, Euskadiko Arraun Federazioko lehendakaria; eta Elias Arruebarrena Gipuzkoako Arraun Federazioko presidentea izan dira prentsaurrekoan.
Herriko alkateordea harro mintzatu da badiaz: “Pasaia arraunaren sorlekua da”. Aintzatetsi du, gainera, asteburuko txapelketak ikusgarritasuna emango diela kategoria gazteenei, sinetsita bulkada direla halako lehiak harrobi gaztea indartzeko. “Zorterik onena opa nahi diet Pasaiako ontziei”, bukatu du, “espero ahalik eta bandera gehien gelditzea herrian”.
San Juango Joxean Gironek ere ilusioz hartu du hitza, eta itxaropentsu agertu da Gazte kategoriako neska nahiz mutilen ontziekin, biak Euskadiko Txapelketan nagusi izan baitziren joan den asteburuan. “Uste dugu aukera garbiak dituztela banderak eskuratzeko”.
