Herri Arte Eskolako matrikulazioa, martxan
Izen-emate epea maiatzaren 5ean hasi eta 19an bukatuko da, eta online formatuan egin beharko da eskolako webgunean.
Garazi Lopez de Etxezarreta, Herri Arte Eskolako lehendakaria. Herri Arte Eskola datorren kurtsoa antolatzen dabil dagoeneko. Aste Santuko oporraldiaren ondoren, 2021-2022 ikasturteari bukaera berezia emateaz gain, 2022-2023 kurtsoko izen-emateak irekiko dituzte hurrengo astean. Egungo ikasleek maiatzaren 5etik 10era bitartean egin ahal izango dute matrikula, eta ikasle berriek, berriz, maiatzaren 11tik 19ra. Gaur goizean Herri Arte Eskolaren egoitzan eginiko agerraldian, Garazi Lopez de Etxezarreta eskolako lehendakariak nabarmendu du matrikula online bete beharko dela eskolako webgunean. Horrez gain, lehendakariak azpimarratu nahi izan du Herri Arte Eskola denentzat izango dela irisgarria, eta ordaindu beharrekoa herritarren gaitasun ekonomikoaren edota errenta mailaren araberako prezioetan oinarrituko dela, hau da, matrikula tasa egokituak eskainiko dituztela.
Eskaintzen dituzten diziplina guztiak sei adarretan sailkatzen dira. Alde batetik, 4 eta 7 urte arteko haurrei zuzenduriko Hastapen Artistiko Multidiziplinarra dago. Bertan, gaztetxoek musika, gorputz adierazpena, ahotsa eta arte plastiko ikusizko saioak egiten dituzte. Gorputz adierazpenari dagokionez, dantza espezialitate guztiak probatzeko, errotazio sistema baten baitan, euskal dantzan, klakean, balletean, dantza garaikidean eta urbanoan murgildu dira ikasleak.
Gainontzeko bost adarrak 8 urtetik aurrerako herritarrei eskaintzen zaizkie, eta diziplina horiek honakoak dira: Arte plastiko ikusizkoak, antzerkia, dantza, hitza eta musika.
Klaseetara bertaratzeaz gain, Herri Arte Eskolako kideen helburua da ikusle profila indartu eta artearekiko zuzeneko zaletasuna sustatzea. Ildo horretan, hainbat irteera egin dira ikasle, guraso eta irakasleen partaidetzarekin. Horrez gain, Lopez de Etxezarretak azaldu du, datorren ikasturtera begira berrikuntza horietan sakontzen jarraitu nahi dutela beharrezko doiketa eta hobekuntzak eginez.
