Pasaia Itsas Festibalaren iraunkortasun atala Trintxerpen kokatuko dute
Lau proiekturen berri emango dute barrutian. Bat irabazi asmorik gabeko erakunde frantziar batena, eta bertoko eragileenak beste hiruak.
Gaur goizean aurkeztu dute PIFaren iraunkortasun arloa, 'Mater' ontzian. 
2022ko Pasaia Itsas Festibalak ahalegin berezia egingo du itsas ondarearen jaialdiak iraungo duen egunetan zehar iraunkortasuna bermatzeko. Horretarako lan ildoen berri eman dute arduradunek gaur goizean, gaiarekin lotura zuzena duen Mater Ontzi Museo Ekoaktiboan bertan.
Irabazi asmorik gabeko elkarteei edo iraunkortasunaren arloan lanean diharduten inguruko eragileei gonbidapena egin diete PIFarekin bat egin dezaten, eta gonbita konpromisoz hartu dute horiek. Xabier Agote zuzendariak eman ditu xehetasunak.
Trintxerpeko kaian espazio bat erreserbatuko dute iraunkortasunaren arloko proiektuentzako. Lau hauek nagusituko dira: Scylla (arduraduna: Scylla Wings of the Ocean irabazi asmorik gabeko erakunde frantziarra), Ortze (arduraduna: Pasaiako CIFP BLAS DE LEZO LHII), Materren Izan itsas zaindari, eta Itsaseguzki (sustatzailea: Don Bosco Lanbide Heziketa).
