Euskaraldiaren hirugarren edizioa aurkeztu dute
Euskararen munduan murgiltzeko prest daude errenteriarrak, eta horretarako atzo ekin zioten aurtengo Euskaraldiaren aurkezpenari.
Euskaraldiako hirugarren edizioko aurkezpena, Merkatuzarren. Euskaraldiako hirugarren edizioa martxan jarri nahi dute errenteriarrek, eta aurtengo edizioaren nondik-norakoak aurkezteko asmoarekin ekitaldia egin zuten atzo arratsaldean Merkatuzarren. Kike Amonarrizen eskutik etorri zen aurreko urtetako bi edizioen balorazioa eta 2022. urterako helburuak. Azken urtetan egindako lana azpimarratu zuen Amonarrizek, esaterako lehen hitza beti euskaraz esatearena, edota sarritan eman diren elkarrizketa elebidunak. Hirugarren ediziorako lorpen konkretuak lortzera animatu zuen jendea. Herri Batzordeen beharra aldarrikatu zuen, eta euskalgintza indartzeko deia zabaldu zuen.
Amonarrizen aurkezpenaren aurretik Aizpea Otaegi Errenteriako alkateak hartu zuen hitza. Herritarrak ilusionatzea eta euskarari ate berria irekitzea eskatu zuen Otaegik, eta herriaren aniztasuna azpimarratu zuen. Errenteria-Oreretako etxeetan hitz egiten diren 70 hizkuntzak altxorra direla aldarrikatu, eta euskal komunitatearen trinkotasuna, inplikazioa eta lana goraipatu zituen alkateak.
Ekitaldira jende ugari gerturatu zen, horien artean udalean ordezkaritza duten alderdi guztietako ordezkariak.
