Gipuzkoako Erroten Egunean, bisita gidatua Arrasku, Ugarte eta Ihurritara
Maiatzaren 8an ospatuko da, eta Ihurrita Errota Sustatzeko Elkarteak eta udalak ibilaldi gidatua antolatu dute herriko hiru errotetara.
Ihurrita errotaren barnealdea. Artxiboko irudia Maiatzaren 8an, igandea, Gipuzkoako Foru Aldundiak herrialdeko Erroten Eguna antolatuko du, lehenengoz. Horren harira, Oiartzungo Udalak eta Ihurrita Errota Sustatzeko Elkarteak bisita gidatua antolatu dute elkarlanean, herriko hiru errotetara. Elkarteko kide Alex Rotetak zuzenduko du bisita, eta erroten funtzionamendua eta ondare historikoaren balioa azalduko ditu.
Parte-hartzaileak goizeko 09:45etan elkartuko dira Karrikako Artaso Elkartean eta auzoko Arrasku errota bisitatuko dute. Bertatik, Altzibarrera abiatuko dira oinez, Ugarte errotara. Bigarren errotan egon ostean, ordea, busez mugituko dira Ugaldetxo auzora, bertan dagoen Ihurrita errotara. Bisita gidatua Karrikara itzuliko da busez, amaitzeko.
Parte hartzea doakoa da, baina plazak mugatuak direnez, antolatzaileek 943 494 521 telefonoa edo helbide elektroniko hau jarri dituzte interesdunen eskura.
