[Galeria] Koki Eskisabel, bizitza oso bat Pasaia KEri emana
42 urtez gorputz eta arima Pasaia KEren alde lanean ibili ondoren, erretiroa hartzea erabaki du Jokin Eskisabel Oiarbidek.
Pasaia Kirol Elkarteak Jokin Koki Eskisabel Oiarbide omendu zuen larunbatean, Don Boscoko Jesus Mari Zamora futbol zelaian. 42 urtez Pasaia KEn gorputz eta arima lanean ibili ostean, aurten azken sasoia izan du bertako arduradun tekniko bezala. Familia zuri-gorriak, zaleek, antxotarrek, jokalari izandakoek, eta noski, familiak, aitortza egin zioten Eskisabeli egindako lan guztiagatik. Une hunkigarri asko bizi izan ziren larunbatean zelaiaren gainean eta harmailetan.
Pasaiako futbolean bakarrik ez. Erreferente izan da Errenteriako Gaztelutxo baserrian jaiotakoa Gipuzkoako eta Euskal Herriko futbolean. Arrasto sakona utzi du bere lan handiagatik, egiteko eragatik, konpromisoagatik eta ezkuzabaltasunagatik. Inork gutxik esan dezake hitz txar bat Eskisabelen gainean. Lan isilean askotan, beti aurrera egiteko gogoa eta grina azaldu du unerik latzenean ere, Pasaia KEk izan baititu une zailak. Egun, ordea, gorenean da kluba, lehen taldea Hirugarren Mailan duelarik, eta harrobia indartsu dagoelarik. Hori guztia, eta aurretik egindakoak, izan zituzten gogoan larunbatean.
Arrastoa batez ere Pasaia KEn utzi badu ere, Gipuzkoako beste hainbat taldetan ere izandakoa da Eskisabel, hala nola Oiartzunen, Anaitasunan, Touringen, edo Real Unionen. Haien guztien ordezkariek oroigarriak eman zizkioten larunbatean. Realak, Eibarrek eta Gipuzkoako Futbol Federazioak ere aitortza egin zioten Eskisabeli. Eta noski, Pasaia Kirol Elkarteak ere ohorezko banderatxoa eta Amaia emazteari lore sorta eman zien biei, Eskisabelek egin duena egiteko familia ondoan izatea ezinbestekoa izan baita: Juan Eskisabel Oiarbide anaiak lore sorta eman zion aldi berean. Aitor Etxebarriazarraga talde nagusiaren kapitainak bertso eskaini zion, arras hunkigarria.
Ohorezko sakearen ondoren partidaren unea iritsi zen. Pasaiak 0-1 galdu zuen Vitoriaren kontra. Beharbada, emaitza gutxienekoa izan zen, bi taldeek Hirugarren Mailako lanak txukun eginak zituztelako (mailari eutsi diote biek), eta unerik gorena partida hasi aurretik, omenaldia, izan zelako.
