Pentsiodunek borrokan jarraituko dutela argi utzi dute
Hilabeteko lehen astelehenean kalera irten dira pentsiodunak euren aldarriekin jarraitzeko, eta maiatzaren 12an Gasteizen antolatu den manifestaziora joateko deia luzatu diete herritarrei.
Euriak ezin izan ditu pentsiodunak geldiarazi. Hilabeteko lehen astelehena eurena dela argi utzi dute pentsiodunek. Euria lagun izan badute ere, kalera atera dira euren aldarrikapenekin jarraitzeko eta aurrera eramaten ari diren ekintzen eta kanpainen berri emateko. Lehenik eta behin, Maiatzaren 1a gogoan izan dute, eta langileen egunaren borrokaren harira, 2022an pentsiodunen egitekoa borrokan jarraitzea dela argi utzi dute, aurrera jarraitzeko eta euren aldarrikapenak lortzeko.
Apirileko mobilizazioetan zehaztu zuten Euskal Herriko pentsiodunek EAEko eta Nafarroako Gobernuei bideratutako proiektu bat abiatu zutela erakusteko bideragarria dela pentsio guztiak gutxienez 1.080 eurokoak izatea. Horren harira, neurri horiek aurrera eramateko babes esplizitua ematea eta beharrezko erabakiak hartzea eskatu diete alderdi politikoei, eta manifestazio bat antolatu dute maiatzaren 12an, osteguna, Gasteizen. Manifestazio hori 11:00etan irtengo da Gasteizko udaletxeko plazatik, eta pentsiodunak Eusko Legebiltzarrera joango dira. Euren asmoa da Eusko Legebiltzarra inguratzea, alderdi politikoak presionatzeko. Manifestazio horretara joateko autobusak antolatu dituzte herritik 10 euroko prezioan, eta pentsiodun guztiei mobilizazio horietan parte hartzea eskatu diete.
Sinadurak biltzen
Horrez gain, apirila eta maiatzean zehar sinadurak biltzen izan dira. Iniziatiba hori Euskal Herri eta Espainia mailan ari dira aurrera eramaten. Horretarako, hiru puntuz osatutako idatzi bat sortu zuten, ondoren Espainiako Gobernura eramango dutena. Egitasmo horren helburua da ahalik eta sinadura gehien biltzea, eta sinadura horiek ekainean Madrilen egingo den manifestazio batean entregatuko dituzte. Momentuz hilabete eman dute sinadurak biltzen, eta gutxi gorabehera, 10.000 jaso dituzte Euskal Herrian orain arte.
Aldarrikapenen artean, ondorengoak sartu dituzte: 2022rako eta hurrengo urteetarako pentsioen erosteko ahalmena bermatzea, KPI errealaren igoeraren arabera; pobrezia-atalasetik beherako pentsiorik ez dagoela bermatzea, soldatetan eta pentsioetan dagoen genero-arrakala ezabatuz eta gutxieneko pentsioa handituz; eta pentsio publiko duin bidezkoak eta nahikoak eta Pentsio Sistemaren izaera publikoa bermatzea.
Bankuen mozioak
Beste behin ere, pertsona zaurgarrienei banku arreta hobetzeko otsailean erregistratu zituzten mozioak izan dituzte hizpide. Pentsiodunek azaldu dute mozioak Euskal Herri osoan sartu direla, baina emaitzak eta erantzunak askotarikoak izan direla nabarmendu dute. Leku batzuetan onartu dira, beste batzuetan ez da erantzunik jaso, batzuetan deuseztatu dituzte, eta EAJ eta PSE-EEk gehiengoa duten lekuetan mozio alternatibo bat planteatu dutela esan dute. Dena den, bi hilabetetan emaitzak izango dituztela helarazi dute, eta hor ikusiko da zertan dagoen egoera. Pentsiodunek eutsi dute mozio horien helburua arazoa erakustea zela, eta dudarik gabe lortu dutela. Errenteria-Oreretako kasuan, esaterako, Kutxa eta Laboral Kutxak arretarako ordu presentzialak luzatu dituzte pertsona zaurgarrieneni banku irisgarritasuna errazteko.
