Nikaraguan gertatutakoa ez ahazteko erakusketa inauguratu dute
Amerikako herrialdean azken urtetan ematen ari den Giza Eskubideen urraketa salatu nahi dute erakusketaren bitartez.
![](https://oarsoaldea.hitza.eus/site/files/2022/05/1651595533457.jpg)
Nikaraguako gobernuak herritarren aurka burutzen ari den Giza Eskubideen urraketa du hizpide atzo Xenpelar Etxean inauguratu zuten erakusketak. Aurkezpena Josefa Meza eta Silvia Zuñiga nikaraguarren partetik etorri zen. Lehenengoa, Nikaraguako gobernuak eraildako gazte baten ama da; bigarrena, aldiz, aktibista feminista da.
Aurkezpena hasi baino lehenago Kultura zinegotzia den Itziar Ostolazak eskerrak eman zizkien biei egindako lanagatik, eta Errenteriako Udalaren konpromisoa berretsi zuen: “Beharrezkoa da memoria hura bisibilizatzea, kontatzen ez bada ahaztu egiten delako”. Bide batez, babesa eskaini zien bi emakumeei eta Nikaraguako herriari Errenteriako Udalaren izenean.
Jarraian, Josefa Mezak hartu zuen hitza eta bere egoeraren berri eman zuen, esanez momentu honetan erbesteratu gisa bizi dela, bere herrialdetik kanpo. Daniel Ortegaren gobernuak bere semea hil zuela jakinarazi eta ikerketa bat egiteko eskatu zuen Mezak: “Egia jakin nahi dugu. Justizia, egia eta ez errepikapena. Horiek dira gure aldarrikapenak”. Bere esanetan, erakusketa gertatutakoa ez ahazteko oso baliagarria izan daiteke, eta egungo egoera geroz eta larriagoa dela salatu zuen.
Ildo beretik jo zuen Silvia Zuñigak. Bera aktibista feminista da, eta orain dela lau urte atera zen Nikaraguatik, eta Euskal Herrian bizi da orain. Nikaraguako erregimenaren aurka doan guztia ez dela onartzen jakinarazi zuen; eta kolektibo ezberdinek, bere kasuan kolektibo feminista, jasaten duten errepresioa izugarria dela jakitera eman zuen Zuñigak. Berak argi du 80ko hamarkadan eraiki zutena ez duela zerikusirik egungo erregimenarekin: “Hau ez da iraultza bat, hau familia diktadura bat da”.
Aurkezpenaren ondoren, bideo bi emititu zituzten, eta horiek amaitu ostean, bertaratutakoek galderak egiteko aukera izan zuten. Erakusketa dagoeneko martxan da, eta hilaren 7an amaituko da.