Bakardadearen aurkako programa bat abiatu du Udalak
Egitasmoaren helburua da bakardadea jasaten duten pertsonei arreta pertsonalizatua ematea eta dituzten premiei erantzuna bilatzea.
Eñaut Gracia eta Aizpea Otaegi. Nahi gabeko bakardadeari aurre egiteko programa bat abiatu du Errenteriako Udalak, eta gaur goizean eginiko agerraldian, Aizpea Otaegi alkateak eta Eñaut Gracia Gizarte Zerbitzuetako zinegotziak azaldu dute egitasmoaren helburua dela bakardadea jasaten duten pertsonei arreta pertsonalizatua ematea eta dituzten premiei erantzuna bilatzea.
COVID19-aren konfinamenduaren lehen fasean zaintza sare publiko komunitarioa sortu zen herrian, eta 70 urte baino gehiago zituzten edo 65 urte izanik bakarrik bizi ziren pertsona guztiei deitu zitzaien. Iniziatiba horren helburua zen jakitea adineko pertsonak nola zeuden eta zein premia zituzten. Antzeman zituzten behar horiek sare komunitarioaren bidez artikulatu ziren.
Prozesu horretan egin ziren deien bidez 100 pertsona inguruk adierazi zuten bakardadea sentitzen zutela eta akonpainamendu emozionala behar zutela. Hori dela eta, errealitate hori antzemanda eta behar horiei erantzuteko asmoz, udalak bakardadea sentitzen duten pertsonei laguntzeko programa abiatu du. Sare komunitarioan parte hartu zuten boluntarioez harago, udaletik ikusi dute egoera horri modu profesionalean erantzun behar ziotela; horregatik, bi hezitzaile lanaldi osoz ariko dira lanean.
Programa pilotuaren ezaugarriak
Proiektua martxan da dagoeneko, eta helburua 100 pertsona horiekin kontaktuan jartzea da. Momentu honetan, adineko 40 pertsonari gutunak bidali zaizkie etxera. Programaren lehen urratsa telefono bidezko elkarrizketa bat izaten da, eta erabiltzaileak hala nahi badu, ondoren aurrez aurreko hitzordua egiten da.
Esku-hartzea pertsona horiekin hainbat hitzorduren bidez lotzean datza, eta elkarrekin sozializatzeko eta bakardadetik irteteko prozesu indibidualizatu bat lantzean.
Udaletik kontaktatutako 40 pertsona horietatik, pare batek uko egin diote proposatutako programan parte hartzeari, konfinamenduan adierazi zutena baino egoera hobeagoan daudelako eta sare familiarra berreskuratu dutelako. Gainerakoek, berriz, esku-hartze prozesua hasi dute, eta udala lanean ari da haiekin. Kasu batzuetan telefono bidezko harreman jarraitua izatea adostu da, eta elkarren artean baloratuko dute beste urrats bat eman nahi duten. Beste kasu batzuetan, sozializazioa berrezartzen lagunduko duten errutina horiek eraikitzen hasi dira.
Izaera pilotua duen programa horren bidez, udalaren helburua da adineko 100 pertsona horiek modu pertsonalizatuan eta indibidualizatuan harremanetan jartzea eta haiei arreta ematea, esku-hartzearen bidez pertsona horiek zer nolako premiak dituzten baloratzeko eta nahi ez den bakardadeari modu integralean helduko dion planteamendu bateratua egiteko, udalaren eta udalerriko gizarte eragileen artean.
