Jose Luis Ansorena bekaren II. edizioa, bihar
Andra Mari Abesbatzaren egoitzan izango da, 16:00etan, eta 13 ikaslek hartuko dute parte jendearentzat zabalik egingo diren probetan.
Jose Luis Ansorena bekaren kartela. Duela bi urte hasitako bideari jarraipena emanaz, Errenteria-Oreretako Andra Mari abesbatzak bere egoitzan antolatu du Jose Luis Ansorena beka emateko interpreteen lehiaketa. Beka horren bigarren edizioa bihar izango da, 16:00etatik aurrera.
Musikeneko Interpretazio Klasiko eta Jazz Masterretako hamahiru ikaslek hartuko dute parte jendearentzat zabalik egingo diren probetan. Lehiaketaren irabazleak beka bat jaso eta kontzertu bat eskainiko du Errenteria-Oreretan aurrerago iragarriko den datan. Epaimahaiaren erabakia bihar bertan jakinaraziko da, proba guztiak bukatutakoan.
Jose Luis Ansorena bekaren bidez, batetik, Musikeneko Masterretako ikasleek laguntza ekonomikoa izango dute euren prestakuntzarako; eta, bestetik, Andra Mari Abesbatzak bere sortzaileak abiatutako bidetik jarraituko du talentu gazteei laguntzen eta euskal musika bultzatzen.
