LGTBIQ+ mugimendua eta feminismoa gerturatuko diete haurrei, liburuen bitartez
"Genero ikuspegia duten eta aniztasuna bere zabaltasunean balioan jartzen dituzten" liburuekin egingo dute topo haurrek larunbatean, 'Ku-Ku!' izeneko egunean. Liburu txokoaz gain, bestelako ekintzak ere egingo dituzte, arratsalde osoz.
Oiartzungo Feministen Asanbladak eta Abaraxka ludotekak elkarlanean Ku-Ku! izeneko eguna antolatu dute larunbat honetarako (hilak 14), Haur Literatur LGTBIQ+ eta feminista lemapean. Askotariko ekintzak egingo dituzte kontzejupean. Nagusia liburu txokoa izango da, baina horrez gain txapa eta orripunttu tailerrak, musika edota marrazketa saioak ere egingo dituztela aurreratu dute.
Haur liburuen txokoa “mimoz” osatu dutela diote antolatzaileek, eta ez dela “eskaintza itxi bat” soilik. Helburu nagusia “LGTBIQ+ gaiak eta egoerak era batera edo bestera ikusarazten dituzten liburuen hautaketa” egitea izan dela diote. “Kontziente ginen gutxi zirela, horregatik barnebildu ditugu genero ikuspegia duten eta aniztasuna bere zabaltasunean balioan jartzen dituztenak”, esan dute.
Kalitateari ere garrantzia handia eman diote liburuen hautaketa prozesuan “literaturzaletasuna transmititu nahi badugu edozerk ez baitu balio” haien ustez. Gehienak album ilustratuak dira, baina hainbat komiki ere aurkituko dituzte bertan haurrek.
Sei hilabetetik gorako haur, gazte eta helduei bertaratzera gonbidatu dituzte antolatzaileek, “haur literaturaren bidaia honetan” murgiltzera. 16:00etatik 19:00etara luzatuko dute larunbatekoa.
