Asfaltatze lanengatik, aldaketak Trintxerpe eta San Pedroko trafikoan
Datozen ostegun eta ostiralean zenbait bide zaharberrituko dituztelako aldaketak egongo dira errepideetan eta garraio publikoan.
Datorren ostegunean Markes de Seoane kalean egingo diren asfaltatze lanak direla eta, ezin izango da Daniel Castelao biribilgunetik San Pedrorainoko jaitsieran aparkatu goizeko 07:00etatik aurrera.
Bestalde, Marinelen igoeraren hasieran dagoen zebrabidea zaharberrituko dutelako, ostiralean autobusak ezingo du bertatik igaro. Aurreikuspenen arabera, 14:00ak arte luzatuko da egoera hori; aipaturiko tartean, beraz, Trintxerpeko goiko aldeari zerbitzua ematen dion linea Euskadi etorbidetik ibiliko da, eta ez da goiko auzoetara sartuko obrak bukatu arte.
Ostiral arratsaldean bertan, Euskadi etorbidea asfaltatzeari ekingo diote kale horren 1. zenbakiaren parean. Lan horiek etorbideko trafiko guztia moztuko dute, baina zamalanak egiteko saihesbide bat ahalbidetuko dute 33. zenbakitik (Lasako bidegurutzea). Bertatik sartu eta irten ahal izango da 14:00etatik 18:00etara.
Ibilgailuen trafikoa, obrak bukatu artean, portutik desbideratuko du udaltzaingoak. Ohartarazi dute, dena den, ordutegiak gutxi gorabeherakoak direla, eta egin beharreko lanen arabera alda daitezkeela. Informazio gehiago behar duenak 943 00 43 00 telefonora dei dezake.
