Igandean, zirkulazioan aldaketak emakumeen Itzulia dela eta
Itzulia Women 2022ko azken etapa bitan pasako da Errenteria-Oreretatik, eta horrek, aldaketak ekarriko ditu zirkulazioan eta garraio publikoan.
Zirkulazioan aldaketak egongo dira igandean. Ostiralean hasiko da Itzulia Women 2022 txirrindulari lasterketa. Itzuliak hiru etapa izango ditu, eta horietako azkena, igandekoa, Errenteria-Oreretatik pasako da birritan. Hori dela eta, iganderako, trafikoan eragina izango duten hainbat neurri ezarri dira.
Zirkulazioari dagokionez, Lartzabaleko eta Niesseneko biribilguneen arteko Nafarroa hiribideko zatia eta azken biribilgune horren eta Lezoko biribilgunearen arteko zatia itxita egongo dira ibilgailuentzat igandean, 10:45etik 13:30era.
Beharrezkoak ez diren itxaronaldiak saihesteko, udaletik gidariei eskatu diete ordutegi horiek kontuan har ditzatela eta ordezko bideak erabil ditzatela Nafarroa hiribidera joateko. Horren harira, N-1 errepideko saihesbidea eta erdialdeko kaleak erabiltzea gomendatzen da auzoetara sartzeko.
Errepidea itxita egongo denez, erdigunetik ibiltzeko asmoa duten herritarrei, ordutegi horiek kontuan izatea eskatu diete, oinezkoentzako pasabideak zeharkatzerakoan arretaz ibiltzeko.
Horrez gain, Nafarroako etorbidean kaltetutako eremuan dauden garajeetan aparkatzen dutenek, kasu horietan erabili ohi diren sarbideak erabili beharko dituzte.
Garraio publikoan, Lurraldebuseko E01, E02, E03 eta E27 lineetan eta U7 hiri linean eragina izango dute trafiko eteteek aurreikusitako ordutegietan.
