Iñigo Mujika: «Erosketak erraztu nahi ditugu, baita denda txikiak lagundu ere»
ENARA zerbitzua jarri dute martxan, herriko dendetako erosketak «erraz, eroso eta erakargarri» egiteko asmoz. Etxetik erosketak egiteko aukera ematen du, etxean bertan edo plazako gailu batean jasotzeko.
Nori zuzendutako zerbitzua da bereziki?
Hasiera batean mundu guztiarentzako da, baina bereziki adineko jendearentzako. Adineko jende asko ikusten dugu poltsaz kargatuta egunero, pisu handiarekin, eta hauentzako mesedegarri izango da. Gero, mugikortasun arazoak dituztenei edo denden ordutegi berberean lan egiten dutenei ere primeran etorriko zaie. Baina uste dugu momenturen batean herritar guztiei on egingo diela zerbitzuak.
Nondik dator proiektua?
Bestelako udalerrietan landutako proiektua gurera ekarri dugu, interesgarria zela ikusi genuen, eta Oiartzun bezalako herri batean egingarria zela. Erosketak erraztea da asmoa, baina baita saltzaileei bultzadatxo bat ematea ere. Posible duzu erosketak egitera joan beti bezala, edo bestela elektroniko bidez edo telefonoz egin dezakezu, modu eroso batean. Erosketak erraztu nahi ditugu, baina baita herriko komertzio txikiak lagundu ere. Guretzako lana oso-oso antzekoa da, berdin-berdin prestatu behar dugu eskaera.
Ohitura handia dago jada erosketak online egiteko, baina horiek ez dira herrian bertan egiten.
Hori da asmoa, denda handietan egiten diren online salmentak txikian ere egin daitezkeela erakutsi nahi dugu, herriaren onurarako. Alternatiba bat eskaini nahi dugu.
Auzo askoko herria izanik, onuragarri izan daiteke erdigunetik urruti bizi direnentzat.
Hala da. Erdigunea urruti dute askok eta haiei erosketak erraztea ere bada asmoa. Plazan Kontsigna izeneko gailu bat jarri dugu, baina proiektua ongi badoa, asmoa auzoetan ere horrelako gailuak jartzea da. Erabileraren araberako erabakiak hartuko ditugu.
Banaketa zerbitzuko enpresak iritsi dira gurera, Glovo esaterako. Horri ere alternatiba bat eskaintzera dator ENARA egitasmoa?
Bai, ENARA, etikoa delako. Langile batek banaketa guztiak egingo ditu, ordutegi zehatz batean, inolako esplotaziorik gabe. Zerbitzua doakoa da gainera, bai dendentzako eta baita erosleentzako ere, garrantzitsua da hori. Denak herrikoak gara hemen, eta hemen erosten duzuna hemen geratzen da, hor dago gakoa. Denentzako onuragarria da. Horrelako enpresa handietan dena kanpora joaten da, galera besterik ez dakar. Teknologia berrien erabilera egokia ere egin daiteke.
Herritarrak erabiltzera animatzeaz gainera, zergatik animatu herriko dendak ENARA proiektuan murgiltzera?
Egun 28 denda gara Itturrin, eta berri bat sartu da ENARAri esker. Eta aurrerantzean gehiago izatea espero dugu. Itturriko kide ez diren establezimenduei ere gonbita egiten diegu, noski. Kontsulta guztiak webgune honetan egin daitezke.
